Anineranut tunngavilersuutaa pissutissaqannginnerarpaa

Inatsisartunut ilaasortaasimasup Kattusseqatigiinnilu siulittaasuusimasup Mads Peter Grønvoldip Kattusseqatigiit suleriaasat naammagiunnaarlugu Demokraatinut nuunnerarnera, tunngavissaqanngitsoq Kattuseqatigiinni siulittaasoq Anthon Frederiksen oqarpoq:

- Ukiarmi siulittaasunngoqqinninni sinerissamut attaveqarnerput aallarteqqinneqarpoq, allaat siornatigut tapersersuisutut tutsiuttarsimanngitsut tubtsiuttalersimallutik. Ukiut marluk siuliinut naleqqiutissagaanni pissutsit pitsanngoriartutut oqaatigineqarsinnaapput. Anthon Frederiksen oqarpoq.

Kattusseqatigiit Inatsisartuni maanna ataasiinnarmik isertitaqarput, qinigaaffiup siuliani sisamanik ilaasortaatitaqarsimagaluarlutik. Siulittaasup sulinera matumani apeqqutaalluinnarsimasoq, Anthon Frederiksen isumaqarpoq.

- 2002-mi qinersineq qiviassagutsigu, Mads Peter Grønvoldip siuttuuffia iluatsitsiffiusimanngilaq. Tassanilu takusinnaavarput, siuttuunermi tapersersuisunik suleqatinillu attaveqarsinnaanermi akornuteqartoqarsimasoq. Siulittaasoq tunngavilersuivoq.

Aamma oqarpoq, Inatsisartuni maanna ataasiinnarmik ilaasortaatitaqaraluarlutik siumut aallariartoqqilersimallutik, innuttaasullu attusseqatigeeqanissaannullu pisariaqartitsisoqarneranik tamanna takussutissiisoq.

- Aamma uanga partiimut allamut nuunnavianngilanga, tapersersuisulluunnit ikiliartulissagaluarpata. Qinersisartunik salloqittaallunga qinersisartunullu neriorsuereerlunga sumut qinigaaffiga imaaliinnarlugu qimannavianngilara, aamma taamaaliulersaanngilanga. Anthon Frederiksen erseqqissaavoq.