Animal Planet Nuup eqqaani filmiliorpoq
Taamatut aallakaatitassiornissamut isumassarsisuuvoq amerikamiu filmiliortartoq David Casey.
- Aallakaatitassiaq tassaavoq amerikamiut kuultisiortartut arfineq pingasut Kalaallit Nunaata pisuussutaanik ujaasinerminni misigisaat pillugit aallakaatitassiaq, David Casey nassuiaavoq.
Taakkua aasaq manna isertorluinnarlutik Nuup kangerluaniipput tv-qarfiup filmiliortartuinit malinnaavigineqarlutik.
TV-qarfiup aalllakaatitassiortartuinit 26-nit amerikamiut pinnersaasiassanik kuultisiornerat nalituunik ujarlerfiusoq malinnaavigaat.
Kuultisiortut arfineq pingasuusut kuultisiortut allat USA-mit tamaneersut 200-t akornanni piukkunnarnersiorneqareerlutik nassaarineqarput. Taakku ilarpassuisa USA qimassimanngisaannarpaat, allaallu naalagaammik avataanut aatsaat angalaartuullutik.
Allaqquttussaanngimmallumi taakku timmisartumik aggustip aallartilaarnerani Nuup mittarfianut tikeriarlutik Nuup Kangerluanut angallanneqarput, sumiiffissaminnullu apuukkamik tupeqarfimmut ineqarfissaminnut iserterput.
Taava septembarip naalernerata tungaanut tassaniittuarput, Nuullu kangerluata pinngortitarsua putsilertarnera, anorersualertarnera, qaqqaasa sisuulertarneri misigisimallugit. Taakkuinnaanngillalli, tassami Nuup Kangerlua seqinnilillaraangat alianaattarnersua misigilluarsimavaattaaq.
Kuultisiortulli misigisartagaat Nunatsinni nungusaataanngitsumik atuinissamik pingaartitsinerput isiginnaartartunut nittarsaanniarlugulusooq sassuma arnaa assersuutigaat.
- Sassuma arnaanik oqaluttuaq amerikamioqatinnut ilisaritinniarpara, David Casey oqarpoq.
David Casey 2008-mi nunatsinneeqqaarami silaannaap kissatsikkiartornera pillugu aallakaatitassioqataajartorpoq. Nunatsinniitillunili pinngortitarsuarput, innuttaasullu nuannaartorilersimavai, asulu piffiit nutaat aggersut kalaallinit nutaarsiassatut pissanganartutullu isigineqarlutik qilanaarineqarput. USA-mullu angerlarami Alaskami kuultisiortut Gold Rush-imik qulequtalik Discovery-mi isiginnaartillugit Kalaallit Nunaani assigusumik aallakaatitassiornissani isumassarsiariartuaalersimallugu.
- Kalaallit Nunaata oqaluttuassartaa nutaaliaanerusoq nunarsuup sinnerata aamma paasisariaqarpaa, David Casey oqarpoq.
Kalaallit aatsitassaatiminnik illersuerpalaartuunerat Casey-p assorsuaq ataqqinartippaa, kuultimillu ujaasinissamik akuersissut Aatsitassanut Ikummatissanullu pisortaqarfiup tunniunniariaraa ulapputtunnguanngorput. Taamaammat nuummiut sulisoralugit tupeqarfissaq napparneqapallappoq, tassalu nunaqarfeeraq nutaaq Nuup kangerluani pilersinneqarluni. Aamma nunatsinni igasut inuusuttut pikkorinnerpaat ilaat Ilannguaq Hegelund kuultisiortunut igasuuvoq, tassalu kuultisiortut saniatigut filmiliornermik suliaqartut 20-t missaaniittut iggattarsimallugit.
Filmiliortut puigunaatsitaminnik qaammatini marlunni Nuup kangerluaneereerlutik New York-imut maanna apuutereersimalerput, tassanilu filmiliarpassuatik killorlugit aallartissimallugit. David Casey-llumi isumaa malillugu kalaallit pinngortitamik ataqqinnittuunerat nunarsuarmioqatitsinnut maligassiuisuunerallu aallakaatitassiani takutinneqartussanngorput.
Ilimagisat malillugit Nuup Kangerluani filmiliaq arfinilinnik immikkoortortaqassangatinneqartoq upernaaru nunarsuaq tamakkerlugu takuteqqaarneqassaaq. Tamatuma saniatigut filmiliaq nalunaaquttap akunnerata aappaa avillugu sivisussusilimmut eqikkarneqarsimasup Katuami takuteqqaarneqarsinnaanissaa David Casey-p neriuutigaa.
