Animal Planet Nunatsinni kuultisiortoq
TV-kkut nangeqattaartuliassaq taanna, Nuup Kangerluani Qeqertarsuarmi filmiliaavoq. Amerikamiut kuultisiullammassuit arfineq-pingasut inuttaapput, taakkulu Kalaallit Nunaanni pinngortitarsuaq, taassumalu pisuussutai uumaatsut, nukitik tamaasa atorlugit misiligarpaat, immaqa qaquguluunniit puigunngisaannagassaminnik.
Kuultisiullammassuit taakku arfineq-pingasut TV-kkut nangeqattaartuliassami pingaarnertut inuttaapput - USA-mi inuussutissarsiutigalugu ujarassiuut hornorujulippassuit akornanni immikkut qinigaasimasut.
Siornalu aasakkut, juuliimiit septembarip tungaanut, Nuup Kangerluanut pipput, tamaanilu tupertiterlutik.Taakkunanngalu arlallit USA aatsaavissuaq qimallugu angalapput. Pinngortitarsuup nukinga imaannaanngitsorsuaq kusanaqisorlu misigaat, arfinilinnillu aallakaatitassiorlutik - taakkulu tassa Animal Planetimi aallakaatinneqartussanngorput - Nuup Kangerluani takisoorsuarmi qinngortoqisumilu immiussat, filmiliortartullu taama nuimatigisut, aatsaallu immaqa ataatsikkut taama amerlatigisut, Kalaallit Nunaanni siorna tikeraarput.
Aallakaatitassiat katillugit arfiniliusussat sapaammi apriilip ulluisa 21-anni tassa aallartissapput, siullermillu Animal Planetimi takutinneqassallutik, eqqarsaataavorli kanalini allani kingusinnerusukkut aamma takutinneqassasut, Nunatsinnit taamaalillutik aamma isiginnaarneqarsinnaajumaarlutik.
Aallakaatitassiallu ilamininngui Nunatsinni aamma takullatsiarneqarsinnaassapput, immaqa qilanaartuutitupajaaq, filmiliortormi David Casey Nunatsinnukassaaq, aallakaatitassiallu Nuummi Kulturikkut Illorsuarmi Katuami maajip ulluisa aappaanni ilisaritissallugit.
Allanik nangeqattaartussanik filmiliornissaq aamma pilersaarutaavoq, kuultisiullammassuit arfineq-pingasut taakku ilisaritinnerisa saniatigut takutikkusunneqarluni Kalaallit Nunaat aatsitassarsiorfiungajalersoq, nunarsuarmi silap kiatsikkiartorneranit eqqugaasoq, sermersuullu aakkiartorneranit sunnigaasoq.
