Nunanit allanit

Angutit pingasut Marokkomi toqumut pillarneqartut

Marokkomi angutit pingasut danskip Louisa Vesterager Jespersenip norskillu Maren Uelandip toqutaanerannut atatillugu toqumik pillarneqartussanngorlugit eqqartuunneqarput.
Assi © : Andy Kyte/Flickr Creative Commons
Allattoq Ritzau
juulip 18-at 2019 13:54

DR taama allaaserisaqarpoq.

Arnat marluk Atlasip qaqqaani pisuttuartillutik siorna decembarimi toqutaapput. Arnat savimmik toqunneqarput kingornalu niaquerneqarlutik. Toqutsineq Islamisk Statimit akisussaaffigineqarpoq.

Eqqartuussutiviup unnerluussisussaatitaasut pasineqartunit 24-nit angutit pingasut toqumik pillarneqarnissaannik piumasaqaateqarnerat malippaa.

Toqumilli pillaateqarnissap naammassineqarnissaa qularnarpoq. Marokkomimi toqumik pillaateqartarneq 1993-imili naammassineqarneq ajorpoq.

Angutit marluk toqutsisimanermik maajimi nassuerutiginnittut pingajuallu videoliorsimasutut nassuerutiginnittoq, nutaarsiassaqartitsiviup AFP-p siusinnerusukkut allaaserinikuuaa.

Suliami unnerluutigineqartunit 24-nit 21-t Islamisk Statimut ilaallutit nassuerutiginnittut, AFP-p aamma allaaserinikuuaa.

Islamisk Statili toqutsinermut akisussaanini pillugu pisortatigoortumik nassuerutiginninnikuunngilaq. Saassussinerni allani taamaaliortaraluarpoq.

/ritzau/

Aamma atuaruk