Angutit pingasut Kangerlussuarmi eqqaassisut politiinit soqutigittaatsuliorsimasutut pasineqarput

Angutit inuusuttut pingasut Kangerlussuarmi sutorniartarfiup Roklubbenip tungaanut eqqarnerminni soqutigitsaattuliorsimasutut politiinit pasineqarput.

Sapaatiummat aallaasersortoqarnerata kingorna angutit inuusuttut pingasut Pinerluttulerinermi inatsimmi soqutigittaatsuliornermi aammalu inuit allat inuunerannik suuannginnerannillu navianartorsiortitsinermi inatsit pineqarluni, Politiit pisortaata tullia, Bjørn Bay Sermitsiaq.gl-imut paasissutissiivoq. Suliaq politiit suli misissorpaat, Bjørn Bayilli uppernarsarpaa sapaatiummat nal. 20.37 politiit kalerrinneqarsimasut, tamatumalu kingorna politiit pisoqarfiusumut ingerlaannaq aallarput tamannalu ilutigalugu peqqinnissaqarfik attaveqarfigalugu. Eqqassinerup suminngaanneernerata paasineqarnissaata tungaanut nerisut tamarmik natermut palloqquneqarput. Arnaq ataaseq nissumigut attoqillatsissimavoq, Bjørn Bay-ilu naapertorlugu toqqaannartumik eqqorneqanngilaq tamatumalu kingorna uusimasoq paasineqarpoq, uuneralu aqerlut ilaata kissarneranit pissuteqarsimagunarpoq.

Bjørn Bay oqarpoq manna tikillugu politiit paasiniaanerisa takutikkaat pasineqartut pingasut taakku ooqattaasarfimmi ooqattaasimasut, silaannarmut eqqarsimasut tamatumalu kingorna aqerlut tuffigitikkusunngisaannut sangusimasut. Angutit inuusuttut Roklubbenimik eqquiniaasimanissaat politiit ilimaginngilaat. Taamaattorli pisoq ima ilungersunartigaaq, allaat pasineqartut akiliisitaasussanngorlugit imaluunniit Pineqaatissinneqarsimasunut Inissiisarfimmiittussanngorlugit eqqartuunneqarsinnaasut.