Angutit pingasut aningaasaliorsimasutut tigusarineqarput

Angutit inuusuttut pingasut salloqittaatinik aningaasaliorsimasutut Aasianni politiinit tigusarineqarput, ullunilu 20-ni tigummigallagassanngortinneqarlutik. Angutit tigusarineqartut tamarmik 20-t inorlugit ukioqarput.
Allattoq Jaaku Lyberth
novembarip 20-at 2009 06:59

- Illoqarfimmi pisiniarfiit ilaanni aningaasaliat 1.000 koruunit 500 koruunillu atorneqarsimasut qularnaatsumik paasivarput. Aningaasalianik atuisut kikkuunerinik pisinarfimmi sulisumit paasitinneqarpugut, Aasianni politeeqarfimmi pisortaq Aqqaluk Petersen Sermitsiamut oqarpoq.

Aningaasaliat qarasaasiaq atorlugu sananeqarsimapput, aamma tigusarinninnermut atatillugu angutit pingasut najugaqarfiini aningaasaliat amerlanerit nassaarineqarput.

- Oqaatigisinnaanngilarput aningaasaasaliat qanoq amerlatiginersut, neriuppugulli amerlanerusunik kaaviiaartitsilersimanngitsut. Pisimasoq erloqinartorujussuartut isigaarput. Pinerlunneq sualuttorujussuuvoq, Aqqaluk Petersen oqarpoq.

Tigusarineqartut qarasaasiaat arsaarinnissutigineqarput Danmarkimullu nassiunneqassallutik, tappavani politiit pinerluttulerinermi teknikkikkut immikkoortoqarfiata inuusuttut qarasaasiaat takussutissanik misissuiffigissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq