Angutit oqaloqatigiittarfissaaleqipput

Sinerissami qimarnguinni misilittakkat takutippaat angutit qimarnguinnut saaffiginnittartut amerliartuinnartut. Qimarnguiilli sullissinerat arnanut meeqqanullu pingaartumik sammisuuvoq.

Taamaattumik Nunatsinni Naligiissitaanissamut Siunnersuisoqatigiit angutinut oqaloqatigiittarfissanik pilersitsiortortoqarnissaanik siunertaqartumik angutinut pikkorissartitsinialerpoq, pikkorissartitsinissaq kulturitta ullorsuani Katuami februaarip ulluisa 19-ianniit 23-at ilanngullugu ingerlanneqassalluni.

- Naligiissitaanissamut Siunnersuisoqatigiit anguterpassuarnit saaffigineqartarput kommuneqarfimminni angutit oqaloqatigiittarfissaannik aallartitserusuttunik.

Taamaattumik angutit aallartitsinissamut sakkussaannik atorsinnaasaannillu pissaqartikkumallugit Naligiissitaanissamut Siunnersuisoqatigiit pikkorissartitsiniarpoq, Naligiissitaanissamut Siunnersuisoqatigiit siulittaasuat, Josef Therkelsen, pikkorissartitsisussarlu Inuk Consult aps. –imeersoq, Nukakkuluk Kreutzmann, nalunaarput.

Angutinut oqaloqatigiittarfiliornissamik siunertaqartumik pikkorissartitsinermi ilaatigut sammineqassapput pilersitsinissamut pilersaarusiorneq oqaloqatigiinnissamullu periutsit siunnersueriaatsillu assigiinngitsut.