Angutit oqaasinngortitsisarnissartik ilinniartariaqarpaat
![](/sites/default/files/styles/image_934x467/public/article_images/julia_dorph_1_1_01.jpg?itok=MSze_gof)
Julie Dorph Lyberth isumaqarpoq oqaloqatigiissinnaanerup kingunerissagaa imminut toquttartut ikilerineri.
Niviarsiaqqat misigissutsiminnik oqaloqatigiinnissinnaasarput, tamannalu pikkoriffigalugu. Killormut nukappiaqqat oqaloqatigiinnikkusuttanngillat. Oqaloqatigiinnermut taarsiullugu massakkorpiaq pisut aallaavigalugit nukappiaqqat qanoq iliuuseqartarput. Taamaattumik nukappiaqqat akornanni imminut toquttarneq takornartaanngilaq, tassaappullu taakku misigissutsiminnik oqaasinngortitsiniarnerini ikiugassat.
- Pingaaruteqarpoq nukappiaqqat misigissutsimik oqaluttuarisinnaanissaannik ilitsersorneqarnissaat, Julie Dorph Lyberth oqarpoq.
Nunarsuatsinni imminut toquttarnerup pinaveersaartinnissaa eqqarsaatigalugu ippassaq septemberip qulingiluaat ulloritinneqarpoq. Imminut toquttarneq eqqartorneqarmat paasinarsivoq, nukappiaqqat angutillu inuusuttut kalaallit kisimik tamanna ajornartorsiutiginngikkaat. Nunani allani aamma tamanna ajornartorsiutaavoq, taamaattumik nukappiaqqat angutillu imminut toquttarnerat pillugu pinaveersaartitsinissaq ukkatarineqarnerusariaqartoq Julia Dorph Lyberthip siunniussaraa:
- Nukappiaqqat eqqarsarnerusarput, aammalu ingerlaannaq qanoq iliuuseqartarlutik, niviarsiaqqalli oqaloqatigiinneq pikkoriffiginerullugu, Julie Dorph Lyberth oqarpoq nangillunilu:
- Niviarsiaqqat imminnut toqoriartartut amerlasuupilussuupput, qujanartumilli ikioqquneq eqqarsaatigalugu ammanerullutik nukappiaqqanut sanilliulllutik, Juli Dorph Lyberth oqarpoq.
Imminut toqunnissaminnik eqqarsaateqartut aamma qimagaasut oqarasuaammut Attavimmut 146-imut akeqanngitsumik sianerlutik oqaloqateqarsinnaapput. Taanna sianerfigineqarsinnaavoq ataasinngornermi pingasunngornermilu unnukkut arfineq-marluniit qulingiluat tungaanut.