Angutit mikinersaat toquvoq

Nunarsuatsinni angutit mikinersaat, He Pingping, 75 centimeterit ataatilaarlugit angissusilik toqusimasoq, Tuluit Nunaanni Guinness World Recordsimit nalunaarutigineqarpoq. Taanna 21-nik ukioqarluni toquvoq.
Allattoq Elisa Isaksen
marsip 16-at 2010 05:37

Kiinamiu taanna 74,61 centimerinik angissuseqarpoq, kingornuttakkamillu qaqutigoortumik inuarannguutigineqartartumik nappaateqarluni. He sapaatip akunnerata naanerani Ruumami tv-kkut takutinneqarnissaminut atatillugu napparsimmavimmut unitsinneqarpoq, puammigulli ajornartorsiuteqarnini toqqutigalugu.

Craig Glendayip, Guinnes Rekordbogimi akisussaalluni aaqqissuisuusup, Hep angissusaa uuttorniarlugu 2008-mi Kiinap avannaaliarnini eqqaamalluarpaa.

- Takoqqaarakkuli immikkukajaaq ittuusoq takusinnaavara. Naalanngippasissumik qungujuttarami ikasarumatuujullunilu. Alutornassusianit sunnertinngitsoorneq ajornarluni, Glenday oqarpoq.

Guinness World Recordsimit oqaatigineqarpoq Hep toqunerata kingornagut nunarsuatsinni kina minnerpaanngornersoq qanittukkut nalunaarutigineqarumaartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq