Politiit ullormut nalunaarutaat: Angutit marluk toqutseriarsimasutut pasineqartut

Angutit marluk Nanortalimmi angummut allamut ippassaq sakkortuumik nakuusereersullu, toqutseriarsimasutut pasineqarlutik tigusarineqarput.

- Sakkortuumik nakuusernertut nalunaarutigineqarpoq, angutilli taakkua marluk, pinerlineqartoq saassunneqarnermi kingorna ajoqusersimangaarmat, toqutseriarsimasutut pasineqarput, Kalaallit Nunaanni Politiini sillimasut pisortaat Poul Kreutzmann oqarpoq, sukumiinerusumilli oqaaseqarnani.

Angutit taakkua marluk ullumi kingusinnerusukkut sassartinneqarumaarput, sillimasut pisortaat oqarpoq.

Illoqarfiit pingaarnersaanni Tasiilamilu umiatsiat marluk ajornartorsiormata SAR-imit annaassiniartoqarpoq. Umiatsiaq Nuup eqqaani ikkarlippoq, inuillu pingasut umiatsiamiittut annaanneqarput isumannaratillu.
Amma Tasiilami umiatsiami ajutooqqasumiittut tamarmik annaanneqarput.

- Tasiilamit nalunaarfigineqarpugut umiatsiaq qulinik ilaasoqartoq, taakkulu tamarmik isumannaatsumik umiatsiamit aaneqarlutillu angerlaanneqarput. Taamaattumik inunnik annaassiniarnerni taakkunani marluusuni ajoqusertoqanngilaq, Poul Kreutzmann oqarpoq.

Pinngortitami ikuallannerit

Sillimasup pisortaata oqaasii kingulliit pinngortitami angalaartunut tamanut kajumissaarutaapput.

- Innermik atuitillusi mianersoritsi. Ikumaartitsiniaraanni, tamanna akisussaassusilimmik nakkutiginnillunilu pissaaq.

Sisimiuni nuna ulluni kingullerni ikuallareersorlu Qaqortumiillu 24 kilometerisut ungasitsigisumi Innaarsuup Qaavata Quassugaarsuullu akornanni nuna ippassaq ikuallareersorlu, taama kajumissaaruteqartoqarpoq.

Kujataani ikuallattumut tunngatillugu, ikuallattup suli qaminniarsarineqarnera, sillimasut pisortaata paasissutissiissutigaa.