Angutit kolesterol-eqarpallaarnerupput
Suli inuit amerlavallaat pujortarunnaarniarneq orsoqarpallaannginnersunillu neriniarneq ajornartorsiutigaat. Taakkulu ajornartorsiutit innuttaasut peqqissusaannut akornutaanerpaapput.
Innuttaasut peqqissusaannik misissuinermi paasineqarpoq inersimasut 8 procentii sukkornermik diabetis-imik nappaateqartut aammalu 35 procentit aavisa naqinerat qaffasippallaartoq. Tamakku nerisanik inooriaatsimillu pissuteqarput. Nerisammi orsoqarpallaat uninngaannarpallaarnerlu inooriaatsimik tunngavilimmik nappaateqalernissamut pissutaapput, taamatullu napparsimalersartut peqqinnissaqarfimmut suliakkersuutaaleriartorput.
Misissuinermi aamma paasineqarput amerlasuut sukkornermik nappaateqarnertik ilisimasimanngikkaat. Taamaammat pitsaaliuinissaq nukittorsarneqartariaqartoq inassutigineqarpoq.
Inooriaatsimik nappaatinut uuttuutaasinnaalluartut ilagaat aap kolesterol-eqarpallaalersarnera, tamannalu nunatsinni angutit amerlanerujartortut ajornartorsiutigaat arnat kolesterol-eqarpallaartut amerliartorsorinanngitsut. Taamaammat siusinnerusukkut nappaatit paasineqartarnissaat pingaarluinnartutut tikkuarneqarpoq napparsimanerulernikkut innarluuteqalersinnaaneq pinngitsoortinniarlugu.
