Angutit kisermaassinerat atorunnaarsinneqalerpoq
Tassalusiunnersuut ataatsimiititaliami suliarineqaqqeqqaarani pingajussaaneerneqalerpat akuerineqarnissaa ilimanarluinnarpoq.
Demokraatit akerliupput, isumaqaramik siulersuisuni sulinissami pikkorissuseq apeqqutaasariaqartoq, suiaassuseq pinnani.
Kisianni Siumut, Partii Inuit, Atassut Inuit Ataqatigiillu akuersipput.
-Arnanik piginnaasalinnik siulersuisuusinnaasunik soorunami peqarpoq. Taakkualu saqqumilaartinneqarnerusariaqarput. Taamaammat inatsisisigut arnat immikkut pineqarallartariaqarput, Naaja Nathanielsen oqarpoq
Taassuma 2010-mi suliaq aallartitaa tunuliaqutigalugu naligiisitaanermut naalakkersuisoq, Nick Nielsen siunnersuuteqarpoq.
Arnat angutillu siulersuisuni amerlaqatigiisinneqarnissaasa saniatigut siunnersuummi naligiisitaanermut inatsisit tamarmik inatsimmut ataatsimut katersorneqarput, taavalu pinaasersumut arneriniaanerup inerteqqutaanera erseqqinnerusumik saqqummisinneqalerluni.
Siunnersuut 26-ani siullermeerneqarmat inatsisartunik amerlanerusumik tapersersorneqassasut paasinarsereerpoq.
Tassami Siumut, inuit Ataqatigiit aamma Partii Inuit siunnersuummut isumaqataapput, Demokraatit atassullu akerliullutik.
Aappassaaneerneqarnerani oktoberip 24-ani taasisitsisoqarmat Atassut isumaqataasunut ilanngussimasut erserpoq, tassalu Demokraatit isumaqataanngitsutuaalerput.
Arnaaneq angutaanerluunniit tunngavigalugu toqqarneqartarnissaq uagut tapersersinnaanngilluinnarparput, Anda Uldum Demokraatininngaanneersoq oqarpoq.
Siunnersuut akuerineqassappat januarip aallaqqaataani atuutilissaaq.