Angutit issittormiut kiserliorput

novembarip 21-at 2005 14:06

Angutit issittormiut kiserliortuusut, Nunavumi aviisip Nunatsiaq News-ip allaaseraa.

Arnat nunatsinneersut, Alaskameersut, Canadameersut nunanilu avannarlerni najugallit amerlaqisut nunagisaminniit aallartarput ilinniariartorlutik suliartorlutilluunniit.

Arnat arlaqartut nunaqarfitsik illoqarfitsilluunniit qimakkaangassuk, nunaqqatigiinni angutit amerlaninngortarput, aappassaaleqilersarlutillu.

Piniartut atugarisaat pillugit misissuisartoq Roskildep universitetianeersoq ilisimatooq Rasmus Ole Rasmussen taama misissuisimavoq.

Misissuinermi tamatumani Rasmus Ole Rasmussenip nunatsinni piniartut atugarisaat pillugit misissuinermini paasisimavaa, agguaqatigiissillugu piniartut tallimaniit 10 procentit tungaannut amerlassusillit aappassaaleqisartut.

Rasmus Ole Rasmussenip misissugaa naapertorlugu, nunarput tamaat isigalugu, arnat angutininngarnit procentinik sisamanik ikinnerupput, taassumalu naliliinera naapertorlugu, Canada-mi aamma taamaaginnassangatippaa.

Nunavumi angutit arnallu amerlassusaat misissorneqarsimanngilaq, kisianni Nunavumi ilinniarfik Arctic College arnanik ilinniartoqarneruvoq, taamaattumik tassuunatigut erserpoq arnat ilinniariartortartut amerlanerusimassasut.

Aammattaaq Alaskami nunaqarfeeqqani angutit amerlanerussuteqartarsimapput, angutit 113-ippata arnat 100-sarlutik.

Nalunaarusiami inuit issittumi najugallit ineriartornerannik imaqartumi aamma allaaserineqarpoq, arnat issittormiut angutinik issittumi najugaqartuunngitsunik katissimasut qanoq siammarsimatiginerat.

Angutit tikisitat nunanut issittunut suliartortartut arlaqarsimaqaat, taamaalilluni illoqarfiup nunaqarfiulluunniit arnartai angutinut tamakkununnga katittarsimammata, nunaqqataasut angutitai aappaqanngitsut amerlanerussuteqartariaqalertarsimapput.