Angutit nunatsinni arsaallutik pissartanngorniunnerat Sisimiuni ullumi aallartippoq.
Uummannamit, Ilulissanit, Qeqertarsuarmit, Sisimiunit, Nuummit, Tasiilamit, Qaqortumit Narsamiillu unammiartoqarpoq.
Nunatsinni arsaattartut kattuffianni siulittaasoq, Lars Lundblad, ima oqaluttuarpoq:
- Coca Cola GM Sisimiuni aallartilluarpoq. Illoqarfimmi nalliuttorsiortumi borgmesteri Hermann Berthelsen, unamminermilu aaqqissuisup SAK-p siulittaasua Søren Alaufesen oqalugiarput. Inuppassuit ammaanersiornermi peqataapput.
SAK ammaanersiornermi G-44-mut unammivoq. Inuit pissangasut malunnarpoq SAK-llu ajugaanissaa neriuutigigaat aamma malunnarluni.
B-67 siorna Coca Cola GM-imi ajugaasuugamik ajugaanissartik anguniartussaavaat, taamaattorli maannakkut kikkut ajugaassanersut oqaatigiuminaappoq, Lars Lundblad oqarpoq nangillunilu:
- Ukioq manna angallannikkut pissutsit qangatut ilisimanerat malugivarput. Akisoorujussuanngorsimavoq inissarsiornissarlu ajornakusoorsisimalluni. Angalaneq akikinnerullunilu ajornannginneruniassammat Narsarmiut N-85 Qaqortormiullu K-33 raajarniummik attartorlutik Sisimiuliarput. Silaqqissorsuummat angalalluarsimallutik arfininngormat maanga Sisimiunut apuupput. Unammereerunillu raajarniummut ilaallutik aamma kujammukassapput, Lars Lundblad oqarpoq.
Uummannarmiut aamma taamatut angalasimanersut aperineqarami ima akivoq:
- Uummannarmiut affai timmisartorlutik Sisimiuliarput. Affaalu namminneq angallatiminnik Sisimiuliarlutik. Angallatiminnik Sisimiuliartut aqqutaani puisisimallutik tikipput. Tikimmatalu Uummannarmiortagut neqitulaavissimapput – taamaalillutillu nukittorsarsimallutik, Lars Lundblad naggasiivoq.
Qujanartumik puisip neqaa nukkassaatinut inerteqqutaasunut ilaanngilaq.
Unammiat, sungiusaasut ikiuuttullu katillutik 170-t Sisimiut arsaattarfianni ullup qeqqanut ullumi ammaanersiornermi peqataapput.
Sisimiormiut, SAK, Qeqertarsuarmiullu, G-44, ammaanersiornermi unammisut 1-1-imik tamarmik isertitaqarput.
Unamminerit aappaanni Narsarmiut N-85 Malamukkut Uummannarmiut ualeq unammipput. Taakku unamminerat naammassimmat tamarmik ataaseraarput.