Angutit inuusuttuaqqat Amerikap nunavittaani assammik arsarluni unammersuarneranni, nunatsinnit peqataasut sisamassaa ullumi ajorsarput. Kalaallit Brasiliamut unammigamik 24-38-mik ajorsarput, Brasiliamiullumi ajugaanissaat ilimagineqareersimavoq.
Taamaattorli unammineq sungiusaasup Søren Hildebrandtip naammagisimaarpaa.
- Unamminerup immikkoortuani siullermi naligiillualaavippugut, unamminerulli immikkoortuani kingullermi angummassinnaasimanata. Sungiusaasoq nassuiaavoq.
Kalaallit ajorsaraluarlutik nikallunngillat, Puerto Ricomullu aqagu unammissapput. Tamatumuuna unammisuni kingullertut inissinnginnissaq anguniarneqassaaq ajugaanissarlu ilimagineqarpoq.
- Aqagu ajugaassanngikkutta pakatsingaatsiassaavut. Søren Hildebrandt oqarpoq.