Angutit illumi suliassanut eqinnaatsut arnat piumanerusarpaat
Allatut oqaatigalugu, angutit errorsinermik, nerisassiornermik, pujoralaajaanermik, torersaanermik eqqiaanermillu nuannarisallit arnat pileriginerusarpaat.
Tamanna ilisimatusarnikkut uppernarsineqareersoq, aviisimi Politikenimi ullumi allaaserineqarpoq. Arnat siniffimminni marluuttarissami angutit sorliit tutikkusunnerusarneraat Oxford Universitetimi aningaasarsiornikkut ilisimatuup, Almudena Sevilla-Sanzip, misissuivigisimavaa, nalunaarusiarlu tamanut saqqummiunneqaqqammerpoq.
Angutinik illumi suliassanut eqinnaatsunik arnat kajumiginerusaqarnerisa saniatigut, angutit skandinaviamiut, illumi suliassanut eqinnaatsuunerat pissutigalugu, piumaneqarnerpaasut misissuinermi erserpoq.
Australiamut angutitaat nuannarineqarpallaanngillat, immiaaqqanik mamarisaqarpallaarnerat timersornermillu nuannarisaqarpallaarnerat pissutigalugu.
Angutit illumi suliassanut arnanut naligiimmik ikiuunnissaminnik eqqarsariartaaseqanngitsut misissuinermi aamma paasinarsivoq.
- Angutit naligiissitaanermut piginnaaneqartut arnanit tassa pilerigineqarnerugaluartut, arnat naligiissitaanermik pingaartitsisut angutinit pilerigineqarpallaarneq ajortut, misissuisup Almudena Sevilla-Sanzip oqaatigaa.
