Angutit Ilisimatusarfimmi ilinniartut amerleriaateqarput

Angutit Ilisimatusarfimmi ilinnialersartut ukiut kingulliit pingasut ingerlaneranni amerliartulersimapput.

Ilisimatusarfimmi ilinniarneq septemberip aallaqqaataani aallartippat arnat suli amerlanerussuteqarluassapput. Taamaattorli 2002-mut sanilliullugu angutit pingajorarterutaannaasimagaluartut sisamararterutinngorunik amerleriaateqassasut, Ilisimatusarfimmi rektori Ole Marquardt oqarpoq, nangillunilu:

- Nunarsuarmi sumiluunniit ilinniarfinni ingerlaqqiffiusuni arnat amerlanerusarnerat takornartaanngilaq, maanilu aamma taamaappoq. Eqqumaffigisariaqartorli aamma unaavoq, Ilisimatusarfik manna mikisunnguummat, taamaalilluni angutit ilinniagarigajuttagaat, soorlu ingeniørunngorniarneq ilisimatusarnermullu tunngasut allat maani ilinniarneqarsinnaangimmata. Tamannalu arnat ilinniartut amerlanerunerannik annertusisitsivoq.

Arnat angutillu amerlassutsimikkut taama annertutigisumik nikinganerat suliffeqarfimmi sumiluunniit pitsaasuunngilaq, aamma ilisimatusarfimmi taamaappoq. Tassami arnat angutillu isummersornermikkut, anguniakkamikkut tunngavilersornermikkullu imminnut tapertariissappata amerlaqatigiikannerunik pitsaanerpaassagaluarmat, taamaalillutik pimoorullugu assigiinngissutsitik isumassarsioqatigiiffigisinnaallugit, Ilisimatusarfimmi rektori, Ole Marquardt oqarpoq.

Ilisimatusarfimmi kulturimik inuiaqatigiilerinermillu ukiup aappassaanik ilinniarnerminik ingerlatsisussaq, Mike K.Andersen oqarpoq, ilinniartitaanertik assigiimmik ingerlanneqarmat isumaqarani arnat angutillu tamatumani assigiinngissuteqartut. Soorunami inuttut ataasiakkaatut isummersoriaatsitsiminni arnaaneq angutaanerluunniit sunniuteqartartoq, Mike. K Andersen oqarpoq.

Angutit ilisimatusarfimmi ilinnialersartut amerleriarnerannut, Danmarkimi ilinniarnissaraluaminnut taarsiullugu nunatsinniittalersimanerat, Ilisimatusarfimmi rektorip, Ole Marquardtip pissutaaqataasinnaasoraa.