Angutit futsalerlutik pissartanngorniunnerat aallartippoq

Illup iluani arsaalluni Kalaallit Nunaanni pissartanngorniunnerit Sisimiuni maanna ingerlanneqaleruttorput.
marsip 14-at 2015 17:39

Angutit illup iluani isikkamik arsaallutik, tassa futsalimik, Nunatsinni pissartanngorniutileruttorput, Sisimiuni pissartanngorniuttoqarluni.

Pissartanngorniunnerit ippassaq tallimanngornermi aallartipput, aqagulu naammassineqarumaarlutik.

Holdit aqqaneq-marluk peqataapput, unamminerillu katillutik 34-ussapput, pissartanngorniutivittussallu Sisimiuni aqagu unnukkut nalunaaqutaq arfineq-pingasunut isiginnaariarneqarsinnaassapput.

Unamminerit qulit ippassaq naammassineqarput, aviisilu AG naapertorlgu 91-eriarluni isertitsisoqarpoq.

Unamminerit tulleriiaarneri Kalaallit Nunaanni Arsaattartut Kattuffiata GBU-p Facebookikkut quppernerani GBU Klubforumimi alakkarterneqarsinnaapput.

Aamma atuaruk Futsalimi Nunatsinni pissartanngortut siulliit tassaapput B-67

Nunatsinni Futsalerluni aappassaa pissartanngorniuttoqarpoq. B-67 Nuummeersoq siorna pissartanngorpoq, Maniitsumi siorna finalertoqarmat SAK-mut 4-0-imik ajugaagamik.

Arnat Futsalerlutik Nunatsinni pissartanngorniunnissaat Nuummi pisussatut aaqqissuunneqarnikuuvoq, sapaatillu-akunnerata tulliani pisussaalluni. Arnat pissartanngorniunnissaat tallimanngorpat aallartissapput, sapaatiuppallu tulliani finalertoqarumaarluni.

Futsalerluni unammisoqaraangat katillugit 40 minutsit unammisoqartarpoq, immikkoortunut marlunut avinneqartarlutik. Unamminerilli aamma sivikinnerusinnaapput, tassa unamminermi malittarisassat naapertorlugit unamminerit immikkoortunut marlunnut 15-it minutsinik sivisussulinnut sivikillineqarsinnaammata.