Angutit assammik arsartartut sungiusalerput
Angutit assammik arsarnermi nunanut allanut unammisartut tamakkingajallutik maanna katersuutilerput, unammisartut ilaat nunatsinnit Danmarkiliarput, unammisartut sinneri Danmarkimi unammisartuusut ataasinngornermiit sungiusaqatigissallugit.
Sungiusarnerup saniatigut ullut tamaasa sungiussaatigalugu unammisarniartut, Helsingør Dagblad allaaserinnippoq.
Nordsjælland Håndboldimi pikkorinnerit tulliilu kiisalu Sverige-mi illoqarfimmi Lund-imeersut Lugi sungiusaatigalugu unammissavaat.
Angutit assammik arsartartut nunanut allanut unammisartuisa Helsingørimi sungiusarnerannut pissutaavoq, sungiusaasoq Niels Møller aamma Assammik Arsartartut kattuffianni siulittaasoq John Jakobsen Helsingørimeersuummata.
Kalaallit Nunaanni assammik Asartartut Kattuffianni siulittaasoq John Jakobsen oqarpoq, nunanut allanut unammisartut Helsingørimi sungiusarnerat, VM-imut anngunniunnissamut piareersarnerusoq. Kalaallit Nunaat 2007-mi Tysklandimi VM-qataanermi kingorna suli annguteqqinngilaq. Maanna VM 2013 anngunniarfigilerpaat.
