Angutit assammik arsartartut salliutinneqassapput
Assammik arsartartut angutit pingaarnerutillugit ukioq-manna aallunneqassapput.
Nunatsinni Assammik Arsartartut Kattuffiata ippassaq ataatsimiinnerminni aalajangerpaat.
Apeqqutaalerpoq angutit assammik arsartartut qanoq annertutigisunik aningaasassaqartinneqassanersut.
Kattuffimmi siulersuisunut ilaasortap Michael Mulvad-ip Team Grønland pissartanngorniunnerni nunanilu allani unamminissanut tapersersuisinnaanersoq isumaqatigiissuteqarfiginialeruttornerarpaa.
Apriilimi nunat Amerikaniittut Brasiliami unammersualinnginnerini katersuunnerit pingasut aqqusaaqqaarneqassapput. Akikitsuunngilarlu.
Team Grønland-ilu aningaasanik tapiissaguni angutit assammik arsartartut qanoq piginnaasaqartiginerinut, pilersaarutinillu takussutissaqaqqaarusuppoq.
Arnani assammik arsartartuni inuusuttuaqqat pingaarnerutillugit aallunneqarnissaat siulersuisut nalilerpaat.
Aningaasat pisariaqartinneqartut iluatsinneqarsinnaappata inuusuttuaqqat nunanut allanut unammisartut U-18-it Amerikani unammersuarnernut, Sverige-milu ingerlanneqartussami Partille Cup-imut peqataasinnaassapput.
