Angutit arsarluarnerulersimapput
Nunatsinni assamik arsarluni inersimasuni pissartanngorniunnerit Banknordic GM 2011 Nuummi Inussivimmi ingerlanneqaleruttorput. Ajugaaniutivinnerit qanilliartorneranni, pissanganeq aamma qanilliartorsimassagunarpoq.
Kalaallit Nunaanni assammik arsartartut kattuffianni siullittaasoq Boas Møller ajugaanniutivinnermit ima naliliivoq:
- Oqaatigisinnaavarput unamminersuarneq maannamut ingerlalluartorujussuummat, timersornertaa aamma isiginnaariaqarluarnera. Inussivik ulikkaangajattaarluni unammisullu pissanganarluartut.
- Arlaannik tupaallannartunik naammattuuisimavisi?
Tupaallannartua tassaavoq angutit unammineranni aqagu ajugaaniutiginnissamut kikkutnaapissanersut nalunarmat, oqarpoq.
Maannamut kikkut anngutereerpat?
Arnani angutinilu GSS Nuummeersut aamma SAK Sisimiuneersut.
Annguttut taakku ilimagineqareersutut annguppat?
- Naamik, malugereeratsigu qanoq naligiittartigisut nalornissutaasimavoq kikkut favorit-iunersut.
Kalaallit Nunaanni assamik arsartartut kattuffianni siulittaasoq Boas Møller ajuusaarluni nalunaarpoq arsartut marluk ajutoorsimasut. Arsartut ilaat ippassaq najungasuiarsimavoq ullumilu ataaseq qutuiarsimalluni. Ajutoornerit sinneri annikitsuinnaasimapput.
Assamik arsarluni ajugaaniutivinnerit bronzennanniunnerillu KNR-TV-kut Radiokkullu toqqaannartumik aqagu aallakaatissavagut. Aallakaatitsinivullu nalunaaqutaq ataatsinut (13.00) aallartissavagut.