Angutit arnanit isertitaqarnernerupput

Aningaasatigut piffissaq ajornartorsiorfiuvoq. Arnat ataavartumik, soorlu Namminersorlutik Oqartussani sulisut, akissarsiatigut ajornartorsiorneq maluginngilaat. Angutit aalajangersimasumik suliffeqanngitsut soorlu aalisartut silaannaap allanngoriartorneranik eqqugaaneri aamma akissarsiatigut assigiinngissutsip appariaateqarneranik pissuteqarpoq, Nauja Nathanielsen oqarpoq.

Aamma oqaatigaa arnat suliffeqarfinni namminersortuni sulisut amerlisariaqartut. Ilanngullugulu ernereernemi kingorna sulinngiffeqarlutik angerlarsimasut suliinnarsinnaasanngitsut, taamaammat arnat angutillu naligiimmik sulinissaminnut periarfissaqarnissaat anguneqartariaqartoq.

Ruth Heilmann Siumuminngaanneersoq, akissarsiat assigiinnginnerisa annertussusaat sunik pissuteqarnersoq iternga tikillugu misissorneqassasoq siorna KNR-imut oqarpoq. Tamanna sulinerminni eqqartorsimavaat, kisianni suli iliuuseqarnissaq Akileraartarnermut Atugarissaarnermullu Ataatsimiititaliap suliai suli utaqqinerarpai.

- Akileraartarnermut Atugarissaarnermullu Ataatsimiititaliap suliai naammassippata qanoq oqariartuuteqassanersut utaqqimaarniarlugit, Ruth Heilmann oqarpoq.

Aamma Kattuffiit akissarsiatigut naligiinngissutsip akiorneqarnissaanut suleqataanissaannik kajumissaarpai.

- Apeqqummi massakkut takkuttumi Kattuffiit soorlu SIK aamma GA suleqataanerunissaat pisariaqarpoq, Ruth Heilmann oqarpoq.

Naligiissitaanermut Siunnersuisooqatigiit siulittaasuata Poul Hansenip ataasinngorpat ataatsimiinnerminni angutit arnallu akissarsiaat pillugit eqqartuinissartik oqaatigaa. Demokraatineersoq Niels Thomsen oqaaseqartinniaraluaratsigu iluatsinngilarput.

Atassummiit Siverth K. Heilmannip arnat akissarsiaqqortunerulerneri pitsaasuunerarpaa.