Angutit arnanit akissarsinerusarput

Angutit arnanit agguaqatigiissillugu 40 procentingajannik akissarsinerusarput. Tamanna koruuninngortikkaanni angutit arnanit qaammammut 5.000 koruuninik akissarsinerusarput.
Allattoq Elisa Isaksen
marsip 30-at 2010 05:37

2008-mi agguaqatigiissillugu ukiumut isertitat angutinut 222.000 koruuniupput, arnanullu 161.000 koruuniullutik. Tamanna Naatsorsueqqissaartarfiup akissarsiat pillugit kisitsisaataanni saqqummiunneqaqqammersuni takuneqarsinnaavoq.

Aamma naak kisitsisit 2008-mut tunngagaluartut, tamatuma ullumikkut allannguuteqarsimanissaa ilimagisariaqanngilaq.

Angutit arnanit isertitaqarnerunerat nunap suatungaani aamma sumi ingunngorsimaneq utoqqaassuserlu apeqqutaatinnagit atuuppoq.

Kommuneqarfinni isertitat agguaqatigiissinneranni aamma angisuumik assigiinngissuteqarpoq.

Ullutsinni Kommuneqarfik Sermersuumik taaguuteqalersumi isertitat kommuninut allanut naleqqiullugit qaffasinnerungaatsiarput.

Qeqqata Kommuniani isertitat nuna tamakkerlugu agguaqatigiissitsinermut naapertuutikannerput.

Agguaqatigiissillugu ukiumut isertitat Qaasuitsup Kommuniani aamma Kommune Kujallermi appasinnerupput, kommuninimi taakkunani isertitat nuna tamakkerlugu agguaqatigiissitsinermit 20 aamma 15 procentinik appasinnerupput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq