Angutit arnallu immikkoortillugit sulisoqartarneq akissarsiat nikinganerannut pissutaavoq
Isumaginninnermut naalakkersuisoq Maliina Abelsen isumaqarpoq, angutit arnallu aalajangersimasunik angutinut arnanullu immikkoortinneqarsimasunik suliffeqartarnerat tamatumunnga pissutaasoq. Taamaattumik angutit perorsaasutut ilinniagarsimasut amerlanerunissaat kissaatiginartippaa.
Sulisartoqarnikkut aaqqissuussinerput angutinut arnanullu immikkoortitigaavoq. Tamatuma kinguneranik arnat nalinginnaasumik suliffigisartagaat, soorlu inunnik isumaginninneq peqqissutsimillu isumaginninneq pilerigineqarpallaarneq ajorput, tamannalu akissarsiat qaffasissusaannut sunniuteqartarpoq. Assersuutigalugu perorsaasut aamma isumaginninnermut siunnersortit, angutit suliffigisartagaannit nalinginnaasunit appasinnerumik akissarsiaqartinneqarput, tamakkulu pissutigalugit akissarsiat 40 procentit angullugit assigiinngissuteqarsinnaasarput, taamatullu immikkoortiterisimaneq misissuataassallugu soqutiginartuuvoq, sapaatip akunnerani kingullermi angutit arnallu akissarsiaasa assigiinnginnerat pillugu oqallinnermut tunngatillugu taama oqarpoq, Isumaginninnermut naalakkersuisoq Maliina Abelsen.
Taassuma tikkuarpaa, angutit amerlanerusut arnat suliffigikkajunnerusaannut qinnuteqartalernerisigut assigiinngissutsit minnerulersinneqarsinnaasut. Imalu nangippoq:
- Angutit perorsaasut amigaataasoraakka, tassami meeqqat arnanik angutinillu qummut isigisaqarnissartik pisariaqartippaat, angutillu tamakkuninnga suliaqartut akuttuallaaqaat. Arnat meerartatsinnik paarsisuunerusarput. Arnat angutillu assigiiaarnerusumik suliaqalerpata, inuiaqatigiit imminut tulluarnerusut pilersissavavut, Maliina Abelsen tikkuaavoq.
Inuit Ataqatigiit aamma Siumup naligiissitaanissamut oqaaseqartartuisa akissarsiat 40 procentinik nikinganerisa misissuiffigineqarnissaat ujartorpaat. Aamma naak Maliina Abelsenip misissuisoqarnissaa tapersersoraluarlugu misissuinissaq aningaasaliiffigerusunngilaa.
Nunani Avannarlerni arnat angutillu suliffinnut immikkoortinneqartarnerisa ataatsimoorussamik misissuiffigineqarnerannut, Nunarput peqataavoq. Assersuutigalugu angutit amerlanerusut isumaginninnermik suliaqalersinnaanissaat qanoq anguneqarsinnaanersoq misissuinikkut akissutissarsiniarneqarpoq.
