Angutip toqutsisimanini politiinut nammineq nalunaarutigaa
- Angut arfininngormat ullaap tungaani nalunaaqutaq qulinut qaleriittoq politiinut nalunaariartorpoq, arni toqussimallugu. Politiit kingorna inigisamut misissuiartormata, angut nalunaaqutaq qulit qaangilaaraa tigusaraat, Uummannami politiit pisortaat Bo Borgnæs oqarpoq.
Angut inatsisit tunngaviusut naapertorlugit ippassaq sapaammi ullaap tungaa killisiorneqarpoq, ullunilu 26-ni tigummigallagassanngortinneqarnissaa aalajangerneqarluni:
- Suli misissuisoqarmat angutip tigummigallagassanngortinneqarnissaa aalajangerneqarpoq, Bo Borgnæs oqarpoq.
Arnaq 47-nik ukiulik uini 39-nik ukiulik persuttaasimasutut Uummannami politiinut ataasinngormat decembarip arfineq-aappaanni nalunaarutigaa. Arnap talia saamerleq napineqarsimavoq.
Angut 39-nik ukiulik inatsisit tunngaviusut naapertorlugit politiinit marlunngormat killisiorneqarpoq, tallimanngormallu eqqartuussisoqarmat angut qaammatini qulingiluani pinerluuteqarsimasut inissinneqartarfianniitinneqartussatut pineqaatissinneqarpoq:
Angut 39-nik ukiulik nakuusersimasutut eqqartuussivimmut suliassiissutigineqareerpoq, aammalu nakuusersimasutut pingasoriarluni eqqartuunneqareerluni:
- Pingasoriarluni eqqartuunneqareersimanera suliami matumani isiginiarneqarpoq, qaammatinilu qulingiluani pinerluuteqarsimasut inissinneqartarfianni inissinneqarnissaa aalajangerneqarluni. Angutip pineqaatissinneqarnini akueraa, Uummannami politiini pisortaq, Bo Borgnæs oqarpoq.
