Angutip politiit biilii aserorterpai

Ilulissani angut 22-nik ukiulik, tallimanngornerup unnuaani politiit biiliinik aserorterinermi politiinullu siorasaarinermi qitseraanermilu kingorna tigusarineqarpoq.
Allattoq Medea Frederiksen
juunip 20-at 2011 09:37

Aallaqqaammut Ilulissani politiit angutit marluk imerniartarfiup silataani kamaattut unitsinniarlugit takkussimapput

Politiit angutit marluk eqqissiviilliortitsisunik oqaluussiniarnerisa nalaanni, angut alla akulerunniaqattaalersimavoq.

Politiit tamatigut angut akuleruteqqunagu ingerlaqqusarsimavaat. Angut piniinnarluni akulerunniaannalermat politiinit ajanneqarluni ingerlaqquneqarsimasoq, ulluinnarni aqutsisoq Kasper Berthelsen KNR-imut oqarpoq.

Tamanna angutip kamaatigeqaa. Politiit biiliinut qaqeriarluni qaavani pississaalersimavoq, biilit qaavi imillutsillugit igalaavallu saarleq aserorlugu. Tamatuma kingorna qimaasimagaluarpoq, kingunitsiannguali akuersaarneqarsinnaanngitsumik pissusilersortutut tigusarineqarpoq.

Angutilli kamannera tassunga killeqanngilaq. Politiit biiliisa iluaniitilluni biiliisa iluisa sinai tukkarlugit aserorteriffigisimavai.

Angut politiinit napparsimaviliaanneqarsimavoq nakorsamit misissorneqarniassammat. Apuukkamik angutip politiit qitserartarlugillu siorasaarsimavai.

Tamatuma kingorna angut isertitsivimmi unnuisitaasimavoq arfininngornermilu eqqartuussivimmut sassartinneqarluni. Tassani angut ulluni 20-ni tigummigallarneqassasoq aalajangiunneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq