Angutip 31nik ukiullip angajuni savimmik 42riarlugu kapoorlugu toqukkaa

Pinerluffimmi tumit aarasaartut, assai aattallit kiisalu ilisimannittut sisamat nassuiaataat uppernarsaatigalugit, Sermersuup Eqqartuussiviani eqqartuussivimmi 4mi eqqartuussisut pingasut, 31- nik ukiulik Kaleraq Larsen angajuminik toqutsisimasoq qulariunnaaramikku, ukiuni Xini isertitsivimmiittussanngorlugu pineqaatissiipput.

Toqutsineq pivoq siorna apriilip 16- ianni, Tunumi nunaqarfeeqqami Tiilerilaami.

Kaleraq Larsen eqqartuussivimmi oqaluttuarpoq, ullup ingerlanerani immiaaqqat 18- it missaanni imersimagamigit silaarussimagami, toqutsinerup nalaani pisut eqqaamasinnaagit.

Eqqartuussinerulli ingerlanerani uppernarsineqarpoq, ullut arlallit erngutereerlutik, unnuk taanna toqutsinermik kinguneqarsimasoq.

Angajoqqaavisa illuanni

Kaleraq Larsen oqaluttuarpoq, angajoqqaatik Tasiilamukarsimasut qatanngutigiillutillu tallimanngornikkut, arfininngornikkut sapaatillu ilaa kiisalu ataasinngornikkut, angajoqqaamik illuanni erngussimallutik.

Marlunngornermi apriilip 16-ianni ingerlaannarlutik, Kaleraq ullaarnganiit immiaarartulerpoq.

Unnukkiartulernerani qatanngutigiit arnaq imeqatigisaat, eqqartuussivimmi ilisimannittutut nassuiaavoq.

Taanna oqaluttuarpoq, toqutaasoq silamut pujortariaqatigiartorlugu, takulersimallugu Kaleraq savinnik marlunnik tigummiarluni nikorfasoq, kamattorujussuulluni.

Arnaq silammut qimaagami, toqutsineq igalaakkut isiginnaarpaa.

Erseqqarissumik peqqutissaqanngilaq

Pineqaatissinneqartoq nalinginnaasumik eqqissisimasuusoq, ilisimannittut oqaluttuarput. Tarnikkullu misissorneqaraluarmat aarlerinartorsisoqanngilaq, siornatigullu pineqaatissinneqarnikuunani.

Soormi taava angajuni toquppaa? Eqqartuussivimmi nammineq oqaluttuarpoq, angajumi aappani sakkortuumik oqaluffigiinnarmagu ullup ingerlanerani isumaluutigisimallugu, kisiannili tamanna ajornartorsiuterujussuusimanngitsoq.

Ilisimannittoq alla allamik nassuiaatissaqarpoq. Kaleraq Larsen toqutsereerami, unnuap qeqqata missaani, nunaqarfimmi ilisarisimasani marluk iserfigisimavai. Iserami Kaleraq Larsen nukillaarluni assani aaginnaat, angajuni toqussimallugu nassuerpoq.

Ilisimannittut illumiittut ilaat oqaluttuarpoq, toqutsinerup unnuaani Kaleraq Larsen oqarsimasoq, angajuminit unatarneqartarnini qatsullugu, tamannalu pineqaatissinneqartup marlunnik savilerluni saassussineranut pissutaaqataasoq.

Tamannali pineqaatissinneqartup uppernarsarsinnaanngilaa, oqaatigineqareersutut unnuk taanna eqqaamasaqarfiginnginnamiuk.

Uppernarsaatit ima erseqqaritsigaat, allaat pineqaatissinneqartup illersuisuata nassuerutigalugu, angutip toqutsisimanera uppernarsarneqartoq.