Angutip 31-nik ukiullip ernini toqukkaa
Toqutsinermut atatillugu pisut ataasiakkaat Qaqortumi politiit misissuleruttorpaat. Maannamullu qulakkeerlugu paasineqartoq tassaavoq angutip nukappiaraq ataatsimik ukioqartoq angerlarsimaffiminni qimissimagaa.
Toqutsiffiusoq Qaqortumi napparsimmaviup eqqaaniippoq, alianartumillu pisoqarnerata kingorna angutip 31-nik ukiullip nukappiaraq kissumiarlugu napparsimmaviliaassimavaa.
Angutip 31-nik ukiullip nammineerluni nukappiaraq toqussimallugu, Qaqortumi napparsimmavimmi sulisunut oqaatigaa. Tamatuma kingorna angut politiinit tigusarineqarpoq.
Angut 31-nik ukiulik inatsisit atuuttut najoqqutaralugit killisiorneqarpoq, killisiorneqarnerminilu toqutsisimanini nassuerutigalugu.
Angut taanna oktobarip ulluisa aappaata tungaanut tigummigallagassanngortinneqarpoq.
Toqutsinermut atatillugu politiit maanna misissuipput, toqutsineq sioqqullugu pisut paasiniarneqarlutik.