Angutip 17-inik ukiullip sivisuumik tigummigallagaanenera ineriartorneranut akornutaasoq oqaatigineqarpoq
Kalaaleq angut inuusuttoq, arnamik utoqqarmik toqutsisimasutut unnerluussaasoq, maanna qaammatini 17-ini tigummigallagaalluni paarnaarussaaqqareerpoq. Piffissami tassani susinnaasimanngilaq – ilinniagaqarani, suliaqaranilu sumilluunniit sammisaqartinneqarsimanngitsoq, Nicholas Symes oqarpoq.
Unnerluunneqarnermi suliarineqalernissaata tungaanut, aneersinneqarneq ajorpoq, tigummigallakkallu aamma pulaartoqaqqusaanatik. Taama sivisutigisumik paarnaarusimaneqarnini innarluutigilersimassagaa Nicholas Symesip ilimagaa.
Ilinniagaqartinneqarani, suliffeqartinneqarani allatut sunniutaasinnaasunut saaffissaqartinneqarani silarsuarmilu susoqarneranik paasisaqarsinnaannginnami inuttut ineriartornera unittoorluinnarsimavoq. Taamaammat paarnaarusimaneqarnini innarluutigilersimassagaa Nicholas Symesip qularinngilaa, naalliutsitsinertullu taasariaqarsorinerarlugu.
Naalagaaffik sinnerlugu innuttaasoq ajoquserneqarpat naalliutsitsinertut nalilerneqarsinnaavoq. Timikkut ajoquserneqarneq, soorlu uutiterneq avatinilluunniit innarlerneqarneq kisimik naalliutsitsinertut taaneqarneq ajorput, aammali tarnikkut innarliineq naalliutsitsineruvoq. Nukappiararlu 15-inik ukiulik ukiup aappaata affaani tigummigallakkatut paarnaarusimaneqarnera, tarnikkut innarliinertut taaneqarsinnaavoq, Nicholas Symes oqarpoq.
Ilaatigut tamanna pissutigalugu Inuit Pisinnaatitaaffii pillugit Eqqartuussivimmut, Strasbourgimiittumut pisimasoq suliassanngortinniarlugu, Nicholas Symes oqarpoq. Nukappissap paarnaarusimaneqarnini pissutigalugu innarlerneqaatigisimanaraa, tamannalu naalliutsitsinertut taaneqarsinnaanersoq Inuit Pisinnaatitaaffii pillugit Eqqartuussiviup isummerfigissavaa. Meeqqat inuusuttullu qanoq sivisutigisumik paarnaarusimaneqarsinnaatitaassanersut Eqqartuussiviup aamma nalilissavaa. Naliliinissaq ataatsimut isigalugu periuserisartagassanik tikkuussisuusussaavoq pingaartoq, innuttallu inatsisitigut malersorneqarsinnaanerminni naapertuilluartumik pineqarnissaannik qulakkeerinnittussaassalluni.
Naalagaaffimmi inatsisit naapertorlugit tigummigallagassanngortinneqartut qanoq sivisutigisumik paarnaarusimaneqarsinnaanersut nalugatsigu, tigummigallagassanngortinneqartut ukiut marluk sinnerlugilluunniit maanna paarnaarusimaneqarsinnaasarput, Nicholas Symes oqarpoq.
Nicholas Symesip avoqqaarinnissutini eqqartuussivimmut tunniussassani, kingusinnerpaamik februaarip aallartinnerani naammassissallugu oqaatigaa.
Kalaallimik angummik maanna 17-inik ukiulimmik, toqutsisimasutut nassuereernikumik eqqartuussineq januaarip 27-ani aallartissaaq.
Inuit Pisinnaatitaaffii pillugit Eqqartuussiviup pisimasoq ukiuni marlussunni suliarissavaa.
