Angutimmarik Kreutzmann sungiusaqataaqqilerpoq
Kalaallit Nunaanni angutit nunanut allanut assammik arsarlutik unammisartut U21 Silkeborgimi ulluni makkunani naapipput, Nunarsuarmi pissartanngorniunnermi, Egyptenimi aggustip arfernanniit 20-annut ingerlanneqartussami peqataanissartik sioqqullugit sungiusassallutik.
Sungiusaatigalugu Odder-ip 1. divisionshold-ii arfininngorpat unammineqassapput.
Arsartartorli Angutimmarik Kreutzmann, misiligummik Tysklandimi Bundesligaklub-it ilaanni ullualunni misiliilluni sungiusaqataaqqammerpoq.
- Angutimmarik periarfissittariaqarmat akueraarput, sungiusaasoq Jakob Andreassen Radioavisimut oqarpoq.
Sungiusartut tamakkeqqillutik ajunngeqisut - peqqillutillu piumassuseqaqisut sungiusaasup ilanngullugu oqaatigaa.
Kalaallit håndboldertartut sapaatiuppat aggustip aappaani Københavnimiit Egyptenimi Cairoliassapput, tassani ulluinnarni 35 gradinik kiattoq sungiusaqqaassallugu, unamminerallu siulleq sisamanngornermi aggustip ulluisa arfernanni pissaaq, tassani Estland naapissagamikku.