Anguterpassuit Bagdadimi aallarunneqarput
Irakimi illoqarfiit pingaarnersaanni Bagdadimi ilisimatusarfimmiittut angutit 150-t missaanniitut ullaaq aallarunneqarput. Kikkut, sooq qanorlu aallarunneqarsimanerannut ilisimasat ikittuinnaagallarput.
Angutit aallarunneqartut ilaat pingasut iperagaapput, Bagdadimilu ilisimatusarfiit tamarmik matuneqarallarput.
Angutit 80-t missaanniittut, tamarmik nunap iluani pissutsinut ministereqarfimmi sulisut atisaannik atisallit, biilinut 40-t missaanniittunut ilaallutik Bagdadip qiterpasinnerusortaani ilisimatusarfimmut ullaaq isaapput. Qaffasinnerusumut ilinniarfik, ilisimatusarfiup ilaa, matoriarlugu, ilisimatusarfik isaaffigaat. Arnat takusinnaasatik tamaasa inimut ataatsimut mattussorpaat, angutillu taliisigut qilersorlugit biilinut issoraateriarlugit aallarussorlugit. Aallarussorneqartut tassapput, immikkut ilisimasallit, ilinniartitsisut, atortorissaaruserisut eqqiaasullu. Isiginnittut ilaat oqarput, aallarussukkat katillutik 150-t missaanniissangatillugit.
Aallarussat pingasut ajoqusersimanatik iperagaasimasut qanittukkut nalunaarutigineqarpoq.
Irakimi inatsisartut ataatsimiinnertik unitsippaat, aallarussinermillu misissuigasuartussamik pilersitsillutik. Politiit pisortaat, taassumalu tullersortai arlallit, missuinermi ilanngullutik misissuiffigineqassapput.
Politiit arlariinngorlutik sillimasussaatitaasut shiasiortut najugaqarfiata, Bagdadip kangisinnerusortaata tungaanut, aallarussisunik isiginnaaginnarsimasut, isiginnittut arlallit oqaluttuarsimapput.
Aallarussisut shiasiortuunissaat qularineqanngilaq. Isiginnittut arlallit oqaluttuarput, aallarussinnginnermi shiasiortut immikkoortiterneqarsimasut, sunnisiortullu aallarussorneqarsimallutik. Upperisaqaqatigiit assigiinngitsut imminnut akersuunnerat tunngavigalugu aallarussiniat naakkittaaqisumik toqorakkatik pinnagit sinnerinik aallarussuisimasut, isiginnittut aamma oqaluttuarput.
Irakimi nunap iluani pissutsinut ministereqarfimmi oqaaseqartartoq oqarpoq, politiit tallimat aallarussinermi suleqataasimasutut pasineqarlutik tigusaasimasut.
