Anguteqatiminoortartut oqallisaasorujussuupput
Angut anguteqatiminik atoqateqartartup Savalimmiuni Torshavnimi saassunneqarnerata kingorna, anguteqatiminoortartullu siorasaarneqartarsimanerat pissutigalugit, anguteqatiminnik atoqateqartartut arnallu arnaqatiminnik atoqateqartartut pisinnaatitaaffii Savalimiuni oqallisigineqartorujussuanngorput.
Kinaassusersiortarneq akiorniarlugu inatsisit nunani avannarlerni allani atuutsinneqartut Savalimmiuni aamma atuutilersinneqassanersut pillugit Savalimmiuni naalakkersuisut siulittaasuat Jóannes Eidesgaard oqallinnermut akuliuppoq.
Ammip qalipaataa pissutigalugu kinaassusersiortarnerup upperisarlu pissutigalugu kinaassusersiortarnerup akiorniarlugit inatsisit allanngortinneqassanersut oqallisaataasorujussuuvoq, anguteqatiminnillu arnaqatiminnillu atoqateqartut illersorniarlugit inatsiseqalissanersoq oqallisaataalluni.
Aporfissalli amerlaqaat. Inatsimmik taamaattumik peqalissanersoq Savalimmiuni Lagtingimi taasisitsisoqarmat amerlanerussuteqartut akuersinngillat, tunngavilersuutigineqartullu ilaat Bibelimut tunngassuteqarpoq, oqartoqarluni Bibelimut naapertuutinngitsoq taamaattumik inatsiseqalissagaluarpat.
Anguteqatiminnik arnaqatiminnillu atoqateqartartut katissinnaalernissaat taamaaliornikkut aamma periarfissaalissasoq aamma oqaatigineqarpoq, annilaanngitigineqarlunilu.
Angutip anguteqatiminik atoqateqartartup saassunneqarnermi kingorna uumisaarneqartarsimavoq, sakkortuumillu eqqorneqarnermi kingorna tarnikkut napparsimasut immikkoortortaannut unitsinneqartariaqarsimalluni.
Tamatuma kingorna Savalimmiuni naalakkersuisut siulittaasuat aviisinut allagaqaateqarpoq, saassussinerillu assut assuarineqarlutik.
