Politiit ikioqqusut: Angut una takuviuk?

Nuussuarmi Iggiaani angut toqungasoq sisamanngornermi nassaarineqareersorlu Nuummi Politiit ujaasinermut atatillugu angutip ujaarineqartup assinga saqqummiuppaat.

Allattoq Kenneth Elkjær, Bikki P. Kleist

marsip 30-at 2018 11:40

Angut sisamanngormalli ujaarineqalerpoq, kalaallisut isikkoqarpoq, 170 cm-it missaanik angissuseqarluni.
Angut naliginnaasumik isikkoqartoq kavaajaqarpoq qernertumik tujuuloqarpoq torsusuumik aappaluttumik, taartunillu qalippaaqarluni.

Politiini pigaartut pisortaat, Jan Geisler KNR-imut oqarpoq, angut ujaarineqartoq toqutsinermut atatillugu pasisaanersoq maannamut ilisimatitsissutigisinnaanagu.

- Angut ujaarivarput, paaserusukkatsigu kinaanersoq aamma oqaloqatigerusupparput, toqutsinermullu atatillugu pasisaanersoq pasisaannginnersorluunniit oqaatigisinnaanngilarput, suliamut atatillugu suli misissuigatta, Jan Geisler oqarpoq.

Assimi ujaarineqartoq pillugu innuttaasut ataasiakkaat politiinut saaffiginnissimapput, ujaarineqartumullu atatillugu paasissutissat suli kinguneqanngillat.

Innuttaasut ujaarineqartup sumiiffigisinnaasaanik ilisimannittut imaluunniit ujaarisamik takunnissimasut Politiit pigaartuinut oqarasuaammut 70 14 48-mut saaffiginneqquneqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.