Angut ujaarineqartoq tigusarineqartoq
Nuummi iggiaani toqutsinermut atatillugu angut sisamanngormalli ujaarineqartoq politiinit tigusarineqarpoq.
Kalaallit Nunaanni politiit tusagassiuutinut taama nalunaaruteqarput.
Nuussuarmi Iggiaani - imerniartarfiup Pub Nuannip eqqaani angut toqungasoq sisamanngornermi ullaakkut nassaarineqarpoq, tamatumunngalu atatillugu angut toqutsimasutut pasisatut unnerluutigineqartoq inatsit tunngaviusoq naapertorlugu arfininngornermi killisiorneqassasoq, Nuummi politiit ilisimatitsissutigaat.
Ujaasineq tusagassiuutitigut saqqummiunneqarneranit innuttaasut ujaarineqartoq pillugu paasissutissaatillit politiinut saaffiginnissimapput, innuttaasullu ujaasinermut atatillugu ikiuussimasut politiit qujassuteqarfigaat.
Suliamullu atatillugu innuttaasut paasissutissaateqarsinnaasut politiinut saaffiginneqquneqarput, toqutsisimanermullu atatillugu innuttaasut angummut ujaarineqarsimasumut attaveqarsimasut politiinut 70 14 48-mut saaffiginneqquneqarput.
