Angut ujaarineqartoq nassaarineqarpoq
juunip 06-at 2006 15:30
Upernavimmi angut maajip qiteqqunnerani ujaarineqartoq politiit nassaaraat. Pineqarpoq 31-inik ukiulik Gustav Kristensen, nunaqarfimmit Innaarsunneersoq, nunaqarfiusimasumi Tussaami pinsip ulluani imminut toqussimasoq nassaarineqartoq. Ulrik Eriksen, Upernavimmi politiineersoq oqarpoq, piniartup qimmini Tussaamut alakkarterlugit oqaluffitoqqami angut nassaarisimagaa.Upernavimmi angummik ujaasineq arfininngornermi maajip ulluisa 20-anni unitsinneqarpoq, madrasi 31-inik ukiullip innanngavigisartagaa, dunkillu marluk, benzinamut imermullu atortut, Innaarsuit kujatinnguani immami nassaarineqareersullu, angut ajunaarsimasutut naatsorsuutigineqalermat. Angallataa nassaarineqanngilaq.
