Angut tillillunilu pingitsaaleeriaraluartoq

Arfininngormat novembarip arfernani tillinniartoqarneranik pinngitsaaleeriaraluartoqarneranillu Nuummi politiit paasiniaanerminnut atatillugu takunnissimasinnaasunik pissarsiorput.

Tallimanngormat unnuakkut nalunaaqutaq sisamat qeqqata missaani arnaq 37-nik ukiulik tunumigut  anaaneqarluni taskiminik tilliffigineqarsimavoq, arnap taskianiipput cigaritsit ikittaallu. Arnallu anaasisoq takusimanngilaa. Arnamik pinerliisimaneq isaruaarniarfiup ”synoptikkip” eqqannguani pisimaavoq.

Unnuaq taannarpiaq, tassa tallimanngornerup ullaassaani, nalunaaqutaq tallimanut tanneq arfineq-pingasut missaani arnaq alla 23-nik ukiulik angummit malinneqarluni malugisimavaa. Arnaq Nuup illoqarfiata qeqqanit kujammukaarsimaavoq. Arnaq peqqissaanermut ilinniarfik sanioqqutileraalu angutip arnaq qinilleriarlugu illup isuanut piseriarlugu pingitsaaleriaraluarpaa, pingitsaaleeriaraluarnermini arnap qarlii peerniaraluarsimavai. Arnalli mobiliminit ikiortissarsiorluni sianermat angut qimaasimavoq. Arnallu angut pingitsaaleeriaraluartoq tassaanerarpaa kalaaleq, angivallaanngitsoq, taartunik qernertunilluunniit atisalik, nasarisimavaa nuersagaq ”elefanthue”-mik taaneqartartoq.

Nuummi politiit annerusumik paasissutissaateqannginnamik angummik ilisimannittoqarpat imaluunniit takunnittoqarsimappat politiinut attaveqassapput, uunga sianerlutik 321448.