Assi: Simon Uldum

Angut Tasiilami amiilarnartumik savimmik toqutsisimasutut unnerluussaavoq

Toqutsineq siorna aprilimi pivoq, tassani toqutaq angutip minnerpaamik 42-riarlugu savimmik kapooramiuk.

Angut Tasiilameersoq marlunngorpat Eqqartuussisoqarfik Sermersuumi sassartinneqassaaq, inummik 42-riarlugu savimmik kapoorlugu toqutsisimasutut.

Angut unnerluussaavoq savinnik marlunnik atuilluni toqutaq niaquatigut, qungasiatigut, timaatigut, taliatigut tunuatigullu kapoorsimasutut.

Tamanna takuneqarsinnaavoq unnerluussissummi KNR-ip allagaatinik takunnissinnaatitaaneq atorlugu pissarsiaanni.
Toqutsineq pisimanerangaavoq unnukkut aprilip 16-ani 2019-mi Tasiilami, paasissutissat sukumiinerusut marlunngorpat eqqartuussivimmi aatsaat saqqummiunneqassapput.    

Marlunngorpat eqqartuussut oqaatigineqassaaq

Politiit pisoq paasiniaaffigisimavaat, unnerluussisussaatitaasorlu isumaqarpoq, uppernarsaatit saqqummertut angummik eqqartuussinissamut naammattut.

- Unnerluussisussaatitaasut politiit paasiniaasimanerat tunngavialugu naliliipput toqutsisimasutut unnerluussinissamut tunngavissat naammattut. Eqqartuussiuviup suliassarivaa suliaq isummerfigissallugu, taamatut oqarpoq Emil Maegaard-Hofmann, pisumut unnerluussisussaatitaasoq.

KNR-ip unnerluussaasup illersuisua attavigivaa, taassumali oqaluttuarerusunngilaa angut unnerluussissummut qanoq isumaqarnersoq qanorlu angut nassuiaatissaqarnersoq.

Pisumi illuatungeriit annerusumik paasissutissiinissaminnut tunuarsimaarput, eqqartuussivimmi sassartitaanissaq sioqqullugu. Tamaammallu KNR-ip paasisimanngilaa unnerluussaasoq pinerlineqartumut qanoq atassuteqarnersoq, pinerlineqartorlu angutaanersoq imaluunniit arnaanersoq.

Unnerluussisussaatitaasuniit piumasarineqarpoq angut pisuutinneqassasoq pinerlussimasullu inissiisarfianni minnerpaamik ukiuni 6-ni inissinneqassasoq, tamannalu unnerluussisussaatitaasut oqaatigivaat Nunatsinni toqutsisoqartillugu nalinginnaasumik aallaavigineqartarmat. 

Naatsorsuutigineqarpoq marlunngorpat eqqartuussut oqaatigineqassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat