Angut sakkortuumik saassussinermi kingorna toqutseriartutut pasineqartoq
Angut 25-nik ukiulik sakkortuumik saassussinermi ikinnerpaamik marlunnik toqutseriarsimasutut pasineqarluni tigusaavoq.
Kalaallit Nunaata Politiivi tusagassiuutinut nalunaarummi taama paasissutissiipput.
- Angut 25-nik ukiulik arfininngornermut unnuami ullaakkullu sakkortuumik nakuusersimavoq, inuillu marluk inuunerannik navianartorsiortitsilluni. Taanna toqutseriarsimasutut maanna pasineqarpoq, politiit allapput.
Angut inatsit tunngavisusoq naapertorlugu ippassaq sapaammi killisiorneqarpoq.
Pasineqartoq pinngitsuunerartoq
Politiit angerlarsimaffimmi eqqissiviilliortoqartoq arfininngornermat ullaakkut nalunaaqutaq 9:07 nalunaarfigineqarput, nunaqarfimmilu kommunefogde illumut orniguppoq, pinerluuteqarsorineqartorlu savimmik tigummiaqarlunilu atisai aattaqarmata kommunefogde Aasiannit ikiortissaminik erngertumik aggersaavoq.
25-nik ukuiulik pinngitsuunerarpoq, eqqartuussiviulli unnerluussisussaatitaasut piumasaat malillugu angut oktoberip ulluisa 21-annut tigummigallarneqarnissaa aalajangerpaa.
AAMMA ATUARUK Politimesteri: Nunatsinni imminut toquttu amiilaarnaannartumik amerlapput
Pisumut atatillugu amerlanernik saassussisoqarsimanersoq politiit maanna misissuleruttorpaat.
- Politiit piffissami matumani marlunnut pinerluuteqartoqarsimasoq ilisimavaat, pinerluuteqarfiusoq ataaseq ikilingaatsiarsimammat Nuummukaanneqartariaqarsimavoq. Allanut pinerluuteqartoqarsimanersoq politiit maanna misissuiffigileruttorpaat, politiit allapput.