Angut qiulluni toqusoq
Angut inigisami silataani nalasoq ilaqutaasumit ippassaq ulloqeqqata missaani nassaarineqarpoq.
Timaa 20 gradiinnarnik kissassuseqarsimavoq. Dronning Ingridip Napparsimmavissualiaanneqarnermi kingorna uummataa nakorsanit aallarteqqinneqaraluarsimasoq, Nuummi politiinit ilisimatitsissutigineqarpoq.
- Angut apummi nalasimassangatipparput, sumiissimaneralu maanna paasiniaavigileruttorlutigu. Illoqarfimmiissimanissaa ilimagaarput, Siivaleeraq Therkelsen Nuup politiivineersoq oqarpoq.
Qanorpiaq pisoqarsimanersoq suli nalunarallarpoq, toqusimasumilli ualimut misissuisoqassaaq, angut imigassartorsimanersoq ilaatigut paasiniarneqassalluni.