Angut qitornassaminik kinguaassiutitigut atornerluisimasutut pineqaatissinneqarsimasunut inissiisarfimmiittussanngortinneqartoq

Ilulissani Eqqartuussisoqarfik Qaasuitsumi suliami angut 46-nik ukiulik panissaminik ukiukitsumik kinguaassiutitigut atornerluisimasutut unnerluutigineqartoq tallimanngormat eqqartuunneqarpoq.

Atornerluinerit Upernaviup nunaqarfiani 2014-imit 2023-mut pisimapput.

Angut ukiuni arfineq-pingasuni pineqaatissinneqarsimasunut inissiisarfimmiittussanngortinneqarpoq.

Kalaallit Nunaanni Politiit tusagassiuutinut nalunaarummi paasissutissiipput.

- Meeqqanut kinguaassiutitigut atornerluinerit peqqarniitsuupput, meeraanermimi atornerlugaaneq pinerliffigineqartup inersimasutut inuuneranut sunniuteqartarput. Kinguaassiutitigullu atornerluinerit suliami matumanitut annertutigisut ukiunilu arlalinni pisimasut qujanartumik akuttupput, atornerluisoqarneranut immikkoortortami unnerluussisussaatitaasoq, Alexander Stürup oqarpoq.

Sivisuumi pineqaatissinneqarsimasunut inissiisarfimmiissasoq

Suliami peqqarniilluinnartoqarnera pissutigalugu unnerluussisussaatitaasup sivisuumik pineqaatissinneqarsimasunut inissiisarfimmiittussanngortitsisoqarnissaa tunngavilersuutigaa, tamannalu eqqartuussisup eqqartuusseqataasullu marluk isumaqatigaat, ukiunilu arfineq-pingasuni pineqaatissinneqarsimasunut inissiisarfimmiittuusanngortitsisoqarnissaa nalilerlugu. Nunatsinni eqqartuussisarnermi toqutsisoqaraangat ukiunik arfineq-marlunnik pineqaatissiisoqarnissaa nalilerneqartarpoq.

- Nunatta Eqqartuussisuuneqarfiata meeqqanut atornerluinerit pillugit suliat toqutsisoqarnerani suliani pineqaatissiissutip annertussusaanik killilerneqassanngitsut 2021-mi aalajangerpaa, Alexander Stürup oqarpoq.

Taassuma unnerluussisussaatitaasut suliani peqqarniitsuni pineqaatissiisarnermut killiliussaq, pinerluttunik inatsimmi annertussusiliunneqarsinnaasoq, ukiut 10-t atorneqartassasoq isumaqarput.

- Taamaammat eqqartuussiviup suliami matumani ukiunik arfineq-pingasunik naliliinera naammagisimaarpara, tamanna suliani assingusuni takusimasatsinnit qaffasinnerusumiippoq, Alexander Stürup oqarpoq.

46-nik ukiulik pinerliffigineqarsimasumut 200.000 koruuninik aamma akiliuteqassaaq. Angutip eqqartuussut akueraa, taamaalilluni suliaq naammassineqarpoq.