Assi: Kalaallit Nunaanni Politiit / Grønlands Politi

Angut nipilersukkamit akornusersorneqartoq toqutsinermi suliami pingaaruteqarsinnaasoq

Angut meqqulimmik ilupaarusilimmik taartumik qaatiguulik Aalborgimi atuakkanik atorniartarfiup eqqaani arfininngornermi unippoq. Taanna pingaarutilinnik ilisimasaqarsinnaavoq.

Angut Aalborgimi atuakkanik atorniartarfiup eqqaani nipilersukkamik nipituumik arfininngornermi unnukkut akornusersorneqartoq toqutsinermi suliami pingaaruteqarsinnaasunik takunnissimasinnaavoq.

Nordjyllandimi Politiit taama isumaqarput, taakkulu angut taanna nalunaaqutap 21-p kingunitsianngua Rendsburggademi atuakkami atorniartarfiup isaariaata eqqaaniissimasoq oqaloqatigerusuppaat.

Piffissap tamatuma missaani angut, 38-nik ukiulik, kalaallinit kingoqqisuusoq toqutaavoq. Ilisimannittoq taamaammat suliamut atatillugu pingaaruteqarsinnaasoq, misissueqqissaarnermi aqutsisoq, politikommissæri, Carsten Straszek isumaqarpoq.

- Angutip taassuma inuit marluk atuakkanik atorniartarfiup saanukarsimasut oqaloqatigai. Angutip inuit nipilersugaat nipitooq akornutigisimagunarlugu attaveqarfigai, taanna tusagassiuutinut nalunaarummi oqarpoq.

Angut toqutsinermi pingaarutilimmik ilisimannittuusinnaasoq naatsunik nujaqartutut qaamasumillu ameqartutut nassuiaatigineqarpoq.

Angut 35-t 55-illu akornanni ukioqarpoq, danskisut oqaluppoq, taassumalu qaatigooq taartoq meqqulimmik ilupaarusilik, qarliit taartut kamippaallu taartut atorpai.

Aamma innuttaasut allat Aalborgimi atuakkanik atorniartarfiup eqqaani pasinarsinnaasumik arfininngornermi takusaqarsimasut politiinut attaveqarnissaannik kaammattuuteqarfigineqarput.

Inuit pingasut toqutsisimasutut pasineqarput taakkulu suliamut atatillugu tigummigallarneqarput. Angutit marluk arnarlu 31-t 41-llu akornanni ukioqartut pineqarput.

Taakku angutip 38-nik ukiullip, kalaallinit kingoqqisup atuakkanik atorniartarfiup eqqaani arfininngornermi unnukkut ilisimanngitsup nassaarineqarnerata kingorna tigusarineqarput. Politiit angut nassaarigamikku suli uumavoq. Taassumali ajoqusingaatsiarsimanini sivitsunngitsoq toqqutigaa.

Politiit Aalborgimi atornerluisut akornanni pagginnerup kingunerisaanik angut toqutaasimasoraat.

Nordjyllandip politiivisa inuit pingasut ataatsimut toqutsisimasoraat.

Tigusarineqartut pingasut toqutsisutut pasinninnermi pinngitsuunerarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl