Nanortalimmi kingumut ipilluni ajunaartoqarpoq, taama Nanortalimmi politiit nalunaarput.
Angut Qaqortumeersoq, 41-nik ukiulik Nanortalimmi feriartilluni ippassaq ualikkut tallimat missaanni sissiukkamukarsimavoq.
Aalisariut talittarfimmi talinngatillugu inuttaasa qanngorpallak tusaasimavaat, nipilu suminngaanneernersoq paasiniarlugu alakkaramikku angut immamut nakkarsimasoq siumorpaat ikiortissarsiorasuarlutillu.
Minutsialunnguit qaangiutiinnartut ambulancet nakorsarlu takkupput, angullu qaqinneqarmat paasinarsivoq toqoreersimasoq.
Angutip nakkarnermini niaqquni kalluussimassagaa ilimagineqarpoq, ilisimajunnaaramilu ipisimassasoq, nakorsaq naliliivoq.
Angutip nakkarnerani isiginnittoqarsimanngitsoq, Nanortalimmi politiit pisortaat Niels Nyvang ilisimatitsivoq.
Angutip 41-inik ukiullip Qaqortumeersup ipineratigut Nanortalimmi ukiormanna ipisut taamaalillutik arfinilinngorput. Ukioq januaarimi aappariit ernerallu 14-inik ukiulik ujaarineqartut, februaarimilu angutit marluk ujaarineqartut tamarmik ajunaarsimasorineqarput. Sunnguamilluunniillu ujaasinerit kinguneqarsimanngillat.
