Angut kinaassusersineqarpoq

Københavnip illoqarfiata immikkoortortaata ilaani, Frederiksbergimi, angut kioskimi siorasarisoq, ullaap tungaa politiinit aallaaneqarluni toqunneqartoq, maanna kinaassussersineqarpoq.

Toqusoqarsimatillugu politiit paasiniaasartoqatigiivi naalagaaffiullu inatsisilerituua misissuisimapput, ualerlu paasinarsisimavoq angut toqunneqartoq eqqarsartaatsimigut napparsimasuusimasoq.

- Angut kinaassusersiniarlugu ajornakusoorsimaqaaq. Assaasa ipai atorlugit misissuigatta, politiit toqqorsivianni assinginik nassaarsinnaasimanngilavut. Ualilluinnartoq sisamap qaangilaaraa angut kinaassusersivarput; angut danskiuvoq 43-inik ukioqartoq, Frederiksbergimilu kisimi najugaqarluni. Ilaqutaasa oqaluttuarneratigut paasisimavarput, angut taanna eqqarsartaatsimigut napparsimasuusoq, naalagaaffiup inatsisilerituuanut tullersortaasoq, Birgit Gammelgaard, oqaluttuarpoq.

Angutip timaa aqagu aatsaat misissorneqassaaq, misissuinermilu paasiniarneqassaaq, sunarpiaq angutip toqqutigisimaneraa. Angutip anerningerfigisimasaa politiit misissueqqissaartartuinit misissorneqaleruttorpoq.

Maannamulli paasisavut naapertorlugit, angutip kioskimi pisiassat anaattamik anaartarlugit sequtsersimavai. Politiit aggersarneqaramik qimmertik naalakkersimavaat angut niuagut keeqqullugu. Taamaalisorlu angutip savini tigoriarlugu qunusaarilersimavoq.

Politiit angut ulorianartutut isigigamikku ataatsikkut siffiaatigut tuviatigullu aallaasimavaat. Angut aallaaneqarnermi kingorna toquvoq.

Danmarkimi politiit ukioq manna 111-riarlutik illuinnarsuumminnik sakkulersortariaqarsimapput akuttusuunilli atortariaqartarsimallugit.