Angut ipeqqasoq nassaarineqarpoq
Angut inuusuttoq ipisimasoq Kangaatsiap eqqaani ippassaq nassaarineqarpoq.
Allattoq Elisa Isaksen
novembarip 29-at 2010 10:01
Angut ikinngutinilu umiatsiaaqqamik Kangaatsiamiit Niaqornaarsummukassallutik aallarsimapput.
Niaqornaarsummulli tikinngimmata politiit arfininngormat nalunaarfigineqarput, ujaarineqalerlutillu.
Angut Kangaatsiap qanittuani sissami ipeqqasoq kingorna nassaarineqarpoq.
Angalaqataa pisuinnaq ippassaq Kangaatsiamukarsinnaasimavoq, inuunerminillu maanna ulorianartorsiunngitsoq nalunaarutigineqarluni.
Politimesterip Bjørn Bayip oqarnera naapertorlugu angutip suna toqqutigisimaneraa politiinit maanna misissorneqarpoq.
