Angut inuusuttoq toqutseriarsimasutut pisuutinneqartoq

Angut 33-nik ukiulik angummit 25-nik ukiulimmit februaarimi sakkortuumik nakuuserfigineqareernermi kingorna inuunermi navianartorsiorluni ulluni arlalinni nakorsanit sinitsinneqarpoq.

25-nik ukiulik Qeqqata Eqqartuussisoqarfiani ippassaq eqqartuunneqarpoq, toqutseriarsimasutullu pisuutinneqarluni ukiuni sisamani pinerlineqarsimasunut inissiisarfimmiittussanngortinneqarpoq.

Pinerlineqartoq 33-nik ukiulik ilisimajunnaaqqatilluni arlaleriarluni tilluarneqarsimasoq, isimmittarneqarsimasoq tukkarneqarsimasorlu, unnerluussummi allaqqasoq.

Kalaallit Nunaanni Politiit tusagassiutinut nalunaarummi allapput.

Miserratiginnittoq

Angut 25-nik ukiulik toqutseriarsimasutut ippassaq pisuutinneqarami misiarpoq, pinerlineqartorli ajassimanerarlugu.

25-nik ukiullip saassussinermi kingorna pinerlineqartoq natermi nalasoq qimappaa. Pinerlineqartoq Atammimmi peqqinnissaqarfimmi sulisunit innuttaasunillu ikiorneqarpoq kingornalu Nuummut pinasuartumik aallarunneqarpoq, ullunilu arlalinni nakorsanit sinitsinneqarluni.

Suliami unnerluussisuusup Cecilie Stürupip eqqartuussimmi aalajangiineq iluarisimaarlugu, Kalaallit Nunaanni Politiit tusagassiorfinnut nalunaarutaani oqaatigaa.

- 25-nik ukiullip pinerlineqartoq sakkortuumik nakuuserfigalugu inuuneranik navianartorsiortippaa tamatumani niaqqumigut ajoqusernerit ulorianarluinnartut ilanngullugit. Atammimmi innuttaasut peqqinnissaqarfimmilu sulisut pinasuartumik ikiortissarsiorsimanngittuuppatra pinerlineqartoq aniguisimassanngikkaluarpoq.

-Taamaattumik 25-nik ukiullip toqutseriarsimasutut pisuutinneqarneranut atatillugu eqqartuussimmi aalajangiineq iluarisimaarpara, taanna oqarpoq.

Uunnerluussisussaatitaasut eqqartuussivimmi aalajangernermik anngussivigineqarput, 25-nilli ukiullip  eqqartuussaanerminik Nunatta Eqqartuussisuuneqarfianut suliassanngortitseqqinnissaminut akuersinissaminulluunniit ulluni 14-ini eqqarsarfissinneqarpoq.