Angut inuusuttoq qerussortoq

Pisut tallimanngornerup unnukkuani aallartipput, angut inusuttoq 18-inik ukiulik ikinngutiminit ernummatigineqarluni, Tasiilami politiinut siarngutigineqarmat.

Angut inuusuttoq Tasiilami sapaatip akunnera naanersiorusulluni Tiniteqilaamiit pisuinnaq aallarsimavoq, Tasiilamullu apuutingajalersoq politiinit qamuteralalisartunit siumorneqarluni.

Tiniteqilaaq Tasiilamit 40 kilometerinik ungasitsigisumiippoq, angutillu inuusuttup 30 kilometerit pisoreerai politiinit siumorneqarpoq.

Piterarmat ikinngutaasut ernumalersimapput, politiinullu sianerlutik. Angut ajunngitsoq nassaarineqarpoq, politiinilli ujaarineqarnini tupigusuutigisimaqalugu.

Taamaattorli naammagittaalliornani qamuteralannut ilaalluni Tasiilamut apuunneqarluni.

Inuusuttut Tiniteqilaameersut marluk allat Tasiilami aamma sapaatip akunnera naanersiorusussimagaluarput. Qamuteralannik tilleriarlutik Tasiilap tungaanut aallarput, qamuteralaalli unittoormata aallarteqqinnerlu ajornarsillutik, ikioqqullutik ikinngutiminnut sianerput.

Qiuliivinnerarput, politiillu akuliutsinnaveersaarlugit ikinngutiminnit ikioqquneqarusullutik.

Taarsuarmi anorleqisumilu ikinngutaasut ujarlerput, ujakkatillu nassaarivaat.

Piffissap taamaalinerani angutip aappaa ima qiulertigaaq uisakajaarlunilu, isseruttortoq kamippani peernialersimallugit, tassa tamanna inuit qiulersut ilisarnaatigisaraat politeeqarfiup pisortaata Kristian Sinngertaap Radioaviisimut oqaatigaa.

Annaassiniartut angut inuusuttoq qiulersoq qamuteralannut qilersortariaqarsimavaat, Tiniteqilaaliaallugulu. Arfininngormat angut inuusuttoq taanna qulimiguulimmik aaneqarpoq illoqarfiliaanneqarlunilu, qerussorneri nakorsarneqarniassammata.

Tasiilami politiit pisortaat Kristian Sinngertaat oqarpoq, inuusuttut taakku marluk qamuteralannik tillissimasutut unnerluutigineqassapput.

Annaassiniartulli inuit pingasuusut Carnegie Fondimit sapiitsuliornertik pissutigalugu akissarsitinneqarnissaat innersuussutigineqassalluni.