Sisimiut: Angut inuusuttoq ipisimasoq nassaarineqartoq

Angut inuusuttoq 21-nik ukiulik, Sisimiut eqqaanni Itillip kangerluani aasarsiortarfimmi ipisimasoq ataasinngornermi nassaarineqarpoq.
Timmisartup qulimiguullip 21-nik ukiulik ataasinngornermi unnukkut Sisimiuliaappaa. Asseq toqqorsivimmit. Assi © : KNR // Anton Gundersen Lihn
Allattoq Kathrine Kruse
juulip 30-at 2019 11:30

Angut 21-nik ukiulik aasarsiortarfimmi ippassaq ipivoq.
Itillip kangerluani Eqalugaarsunni ipisoqarsimasoq Aasiaat Radioat VHF-ikkut tusaajuminaatsumik nalunaarfigineqarsimasoq, 
Sisimiuni politiit Aasiaat Radioanit ataasinngornermi unnukkut arfineq marlunut tanneq qulingiluanngulersoq kalerrinneqarput. 

Aasarsiortut sumiiffigisinnaasaat naatsorsoriarlugu politiit qulimiguulik Kangerlussuarmit politiinik qatserisartunillu inuttalerlugu ajutoorfiusumukartitsipput. Angut 21-nik ukiulik anersaartunngitsoq kingorna uummarsaatigalugu Sisimiuliaakkaluarpaat.

Illersornissaqarfiup nittartagaa naapertorlugu angallat alla ajutoorfiusumut siulliulluni apuussimavoq inullu imaanut nakkarsimalluni ipisimasoq nassaarisimallugu.

- Kisianni tassa taqqamani aallaarsimaqataasut aamma helikopterimi inuttat, napparsimavimmilu sulisut annaassiniarigalui kinguneqanngitsoorput, Qeqqata Politiivini pisortaq Johan Davidsen oqarpoq.

Angutip inuunera ataasinngornermi unnukkut qulip qaangilaaraa annaanneqarsinnaanngitsutut nakorsanit nalilerneqarpoq.

Qeqqatalu Politiivi ipisoqarsimanera pillugu suli misissuigamik annertunerusumik oqaaseqarsinnaannginnerarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq