Angut inuit 15-it lastbiilimi nassaarineqarnerannut atatillugu tigusarineqartoq

Lastbiilimi toqungasut timaat 35-t nassaarineqarnerannit sapaatip akunnialuit qaangiutiinnartoq inuit 15-it uumasut nassaarineqarput.
Tuluit Nunaanni toqungasut timaat 39-t lastbiilimi oktobarimi nassaarineqarput. Politiit maanna lastbiilimi allami inunnik 15-inik nassaaqqipput. Tamatumuunalu inuit uumasut nassaarineqarlutik. Assi © : Ben Stansall/AFP/Ritzau Scanpix
Allattoq Ritzau
novembarip 07-at 2019 08:38

Inuit 15-it Tuluit Nunaata kujasissortaani lastbiilimi nassaarineqarnerannut atatillugu angut tigusarineqarpoq.

Nunap immikkoortuani Wiltshiremi lastbiilip eqqaani pasinartumik suliaqartoqarnera pissutigalugu politiit pingasunngornermi unnukkut aggersarneqarput.

Tuluit nutaarsiassaqartitsiviat, Sky News taama allaaserisaqarpoq.

Inuit nassaarineqartut tamarmik 16-ileereersimasuupput. Taakkunanngalu ataasiinnaq napparsimmavimmit misissorneqarnissaa pissutigalugu napparsimmavimmut unitsinneqarpoq.

Angut 50-it sinnerlugit ukiulik nassaartoqarnerata kingunerisaanik tigusarineqarpoq.

AAMMA ATUARUK Inuit 39-t lastbiilini toqungasut pillugit tigusarinneqqittoqartoq

Toqungasut timaat 39-t nunap immikkoortuani Londonip avannaani kitaani, Esseximi oktobarip qaammataani nassaarineqarneranit sapaatip akunnerni arlaqartut kingornatigut taama nassaartoqarpoq.

Toqungasut 39-t tamarmik Vietnamimeersuunissaat politiit ilisimagaat, suliamullu tassunga atatillugu inuti arfineq-pingasut tigusarineqarput.

Suliamut tassunga atatillugu angutit marluk tigusarineqarput toqutsisutullu unnerluutigineqarlutik, matumani angut lastbiilimik aquttoq 25-nik ukiulik Tuluit Nunaanneersoq ilaavoq.

/ritzau/