Angut arnarlu Nanortalimmi pujorneranit annaanneqartut

Inuit marluk pujortumi aqqutissarsiorneranni umiatsiaq orsuerussimavoq.
Qulimiguulik aamma ujaasitinneqarpoq, politiillu qulimiguulimmit ujaarineqartunut radiokkut attaveqarput. Toqqorsivimmit assi
aggustip 12-at 2020 10:58

Nunatta kujataani ataasinngornermi ujaasineq naammassilluarneqarpoq.

Kalaallit Nunaanni politiit paasissutissiipput.

Angut arnarlu umiatsiaaqqamik Nanortalimmiit Saarluliartillutik pujornerani sumiissuseerussimallutillu orsuerussimapput.

Qujanartumilli sumunnalernertik qaqugukkullu uteqqinnissartik ilaquttaminnut oqaatigisimavaat. Taakkuli pilersaarut malillugu sapaammi angerlamut apuussimanngimmata ilaqutaasoq politiinut ataasinngornermi ullaakkut nalunaaruteqarpoq, ujaasinerlu aallartinneqarluni.

Ujaarineqartut ajunngitsut nassaarineqarput Qaqortuliaanneqarlutillu.

Politiit oqarnerat naapertorlugu radiokkut attaveqarnerat nassaariniarnerannut iluaqutaasimavoq.

Ujaasinermi politiit angallataat, Issittumi Sakkutooqarfiup alapernaarsuutaa Ejnar Mikkelsen Issittumilu Sakkutooqarfimmit timmisartoq atorneqarput. Timmisartup umiatsiaarartut ingerlaarfigisimasaat qulaavavaa.

Qulimiguulik aamma ujaasitinneqarpoq, politiillu qulimiguulimmit ujaarineqartunut radiokkut attaveqarput.

Angutimmi arnallu VHF-radiomik umiatsiaaqqamut nassarnissartik eqqaamasimavaat.

Ujaarineqartut Sermersuup qeqertaata avannaaniillutik nalunaarutigaat. Ujaarineqartullu Sermiliup kujasissortaani kangerlunni politiinit akunnerup ataatsip qaangiunnerani nassaarineqarput.