Politiit ullormut nalunaarutaat: Angut aallaasersorsimasutut pasineqartoq

Angut nunaqarfimmi Qaarsuni unnuaq aallaasersorluni sioorasaarivoq. Angut 56-inik ukioqarpoq politiinillu siornatigut pinerluuteqarsimasutut ilisimaneqarnani, sillimasut pisortaat oqaluttuarpoq.

Uummannami sulisussaaleqisoqarnera pissutigalugu, politiit Ilulissaneersut qulimiguulimmik tikisinneqarput, angullu pinaasernertaqanngitsumik tigusarineqarpoq.

Angut politiinit maanna tigummigallarneqarpoq, sillimasulli pisortaata Poul Kreutzmannip, angutip killisiorneqareeruni imigassamillu sunnerteqqajunnaareeruni iperagaanissaa naatsorsuutigaa.

- Iperagaajumaarpoq, suliarli suliarineqassaaq sioorasaarisimasutullu unnerluutigineqassaaq, sillimasut pisortaat oqarpoq.

Sillimasut pisortaata angut pisup nalaani aalakoorsimanera aamma oqaluttuaraa, aaversinnerali naapertorlugu qanoq imigassartortigisimanera oqaatiginngilaa.

- Pisumut atatillugu ajoqusertoqanngilaq, sillimasut pisortaat erseqqissaavoq. 

Ikuallattoqarneranik kalerrisaarineq eqqunngitsoq

Illoqarfiit pingaarnersaanni Atuarfik Hans Lyngemi ikuallattoqarneranik kalerrisaarisoqarmat, politiit qatserisartullu pingasunngornermi ornigupput.

Kalerrisaarinerulli eqqunngitsuunera paasineqarpoq, atuartullu ilaata kalerrisaarut toorsimagaa paasineqarpoq.

- Ikuallattoqanngikkaangat kalerrisaarutip toorneqartassanngitsoq kajumissaarutigerusuppara, Poul Kreutzmann oqarpoq.

Politiit qatserisartullu pimoorussillutik orniguttarnerat tamatumunnga pissutaavoq, kisiannili aamma piaaraluni eqqunngitsumik kalerrisaarisutut unnerluutigineqartoqarsinnaavoq akiligassitserujussuartoqarsinnaallunilu, sillimasut pisortaat oqaluttuarpoq.

Biilertut mianersortariaqartut

Nuummi illoqarfiup qeqqani stafetertoqarmat inuppassuillu arpammata, biilertut ualikkut mianersortariaqartut sillimasut pisortaata aamma eqqaavaa.

Arpannermik aaqqissuussisut angallannermut ilitsersuiumaarnerat taamaattorli utaqqisoqarsinnaanera angallanniarnerullu sivisunerusinnaanera, sillimasut pisortaata paasissutissiissutigaa.

- Pisariaqalissappat politiit akuliunnissaminnut soorunami piareersimapput, sillimasut pisortaat oqarpoq.